თურქული ეკონომიკური გამოცემების ინფორმაციით, Eroğlu Holding-მა სავაჭრო მარკა MEXX-ის გაყიდვაზე ჰოლანდიურ კომპანია RNF Holding-თან მოლაპარაკებები წარმატებით დაასრულა.
თურქულმა ჰოლდინგმა Eroğlu-მ, რომელიც იმავდროულად პოპულარული ბრენდების Colin’s-სა და Loft-ის მფლობელია, MEXX-ი 2015 წელს შეიძინა, მას შემდეგ რაც ბრენდის ჰოლანდიურმა მფლობელმა თავი გაკოტრებულად გამოაცხადა.
თუმცა MEXX-მა ვერ მოახერხა და თურქეთში სასურველი ნიშა ვერ დაიკავა, რასაც ქვეყანაში ეკონომიკური კრიზისიც დაერთო. სწორედ ამ ფონზე Eroğlu Holding-მა მსოფლიო ბრენდის გაყიდვა გადაწყვიტა.
Eroğlu Holding-ისა და RNF Holding-ის გარიგების ღირებულება არ სახელდება. თუმცა საგულისხმოა, რომ 2015 წელს Eroğlu Holding-მა MEXX-ში 21 მლნ ევრო გადაიხადა. ამას გარდა Eroğlu Holding-მა საწარმოს მშენებლობასა და ევროპასა და აზიაში 500 ბუტიკის გახსნაში სოლიდური ინვესტიცია ჩადო.
