"ბოლო პერიოდში კახეთის რეგიონიდან ტვირთბრუნვამ იკლო, შესაბამისად საჭიროებას აღარ წარმოადგენდა ამ ადამიანების ადგილზე მუშაობა“, - ამის შესახებ საქართველოს რკინიგზის ინფრასტრუქტურის დეპარტამენტის იურიდიული სამსახურის უფროსმა ნანა კლარჯეიშვილმა განაცხადა.
მისივე განმარტებით, რკინიგზის თანამშრომლები, რომლებიც დღეს აქციას მართავენ ინფორმირებულები იყვნენ რეორგანიზაციის შესახებ და ყველა თანამშრომლისგან, მათ შორის მოშიმშილეებისგანაც ჰქონდათ თანხმობა კახეთიდან ახალ რეგიონში გადასვლასთან დაკავშირებით.
"ბოლო პერიოდში კახეთის რეგიონიდან ტვირთბრუნვამ იკლო, შესაბამისად, საჭიროებას აღარ წარმოადგენდა ამ ადამიანების ადგილზე მუშაობა. მათი გადაყვანა მოხდა სამხრეთ/დასავლეთ რეგიონში . რეორგანიზაციამდე გაკეთდა ახსნა-განმარტებები, შეხვედრა თანამშრომლებთან. ასევე რეორგანიზაციას წინ უძღვოდა მათი წერილობითი თანხმობა ახალ რეგიონში გადასვლაზე. სამწუხაროდ, რკინიგზის გარეთ აღმოჩნდნენ დესტრუქციული ძალები, რომლებსაც სურთ პრობლემების შექმნა რკინიგზაში. ჩვენ ორჯერ გავუგზავნეთ ამ ადამიანებს განმარტებითი წერილი და ვთხოვთ თანამშრომლობის გაგრძელებას", - განაცხადა კლარჯეიშვილმა და დასძინა, რომ თანამშრომლები უზრუნველყოფილნი არიან როგორც ტრანსპორტირებისთვის, ასევე მათთვის გარემონტდა კუპე ვაგონები, სადაც ყველანაირი საცხოვრებელი პირობაა შექმნილი.
ცნობისთვის, რკინიგზელები დღეს 12 საათიდან, რკინიგზის დეპარტამენტის წინ შიმშილობენ.
დასაქმებულების განმარტებით, მათთვის სამუშაო ადგილის შეცვლა მიუღებელია, რადგან წლებია კახეთის რეგიონულ სამსახურში მუშაობენ და მათი საცხოვრებელიც კახეთში მდებარეობს.
მუშების თქმით, მიმდინარე წლის პირველ აგვისტოს, უჩა ხვთისიაშვილი, ვახტანგ ცისკარიშვილი და აკაკი ჭარელიშვილითბილისში დაიბარეს, სადაც განემარტათ, რომ ისინი საქმიანობას დედაქალაქში გააგრძელებდნენ და მარნეული -გარდაბნის სარკინიგზო ხაზს მოემსახურებოდნენ, რაზეც დასაქმებულებმა უარი განაცხადეს, ვინაიდან გაუჭირდებოდათ ყოველ დღე კახეთიდან თბილისში სიარული.
მუშებს სოლიდარობას უცხადებს რკინიგზელთა ახალი პროფესიული კავშირიც, შიმშილობის აქციაში მათი ორი წევრიც ჩაერთვება.
პროფკავშირებში ამტკიცებენ, ადმინისტრაციამ, ნაცვლად დასაქმებულებთან მოლაპარაკებების გამართვისა, მათი სამსახურიდან გათავისუფლების გადაწყვეტილება მიიღო.
