ჩინური კომპანია „სინოჰიდრო“ სამტრედია - გრიგოლეთის ავტობანის მშენებლობაზე გაფიცულ დასაქმებულთა საკითხს სამშაბათამდე განიხილავს.
როგორც მუშები აცხადებენ, ისინი მოთხოვნების დაკმაყოფილებამდე გაფიცვის გაგრძელებას აპირებენ.
გაფიცულები კომპანიისაგან ხელფასის 50 %-ით გაზრდას მოითხოვენ.
კომპანიის იურისტის განცხადებით კი ხელფასის გაზრდის გარდა, გაფიცულთა ყველა მოთხოვნა დაკმაყოფილდება, თუმცა ანაზღაურების საკითხის განხილვას არ გამორიცხავენ. მისივე თქმით, გაფიცვა ავტობანის მშენებლობას აფერხებს, თუმცა გავლენ თუ არა სამუშაოდ - ეს დასაქმებულების გადასაწყვეტია.
დღეს აქციაზე ინციდენტი მოხდა, რა დროსაც დააკავეს ერთი პირი. ისინი შუქრი ბიწაძის გათავისულებასაც მოითხოვენ. როგორც შს სამინისტოში განაცხადეს, პირი დაკავებულია ადმინისტრაციული სამართალდარღვევათა 166-ე მუხლით, რაც წვრილმან ხულიგნობას გულისხმობს.
დასაქმებულ პირთა საინიციატივო ჯგუფისა და კომპანია "სინოჰიდროს" წარმომადგენლების შეხვედრაზე იმყოფებოდნენ გამგეობისა და საგზაო დეპარტამენტის წარმომადგენლებიც. გაფიცულებმა კომპანია „სინოჰიდროს“ ტერიტორია უკვე დატოვეს.
შეგახსენებთ, რომ "სინოჰიდროს" თანამშრომლები გუშინ გაიფიცნენ.
