ზაზა ფაჩულიას, როგორც ყველაზე წარმატებულ სპორტსმენს, საქართველოს პრეზიდენტი დღეს ღირსების ორდენს გადასცემს.
საღამოს 8 საათიდან კი, ფაჩულია გულშემატკივარს სპორტის სასახლეში შეხვდება.
პრეზიდენტის პრესსამსახურის ინფორმაციით, გიორგი მარგველაშვილის გადაწყვეტილება ზაზა ფაჩულიას პრეზიდენტის ადმინისტრაციის უფროსმა, გიორგი აბაშიშვილმა 16 ივლისს აცნობა. სატელეფონო საუბრისას გიორგი აბაშიშვილმა ზაზა ფაჩულიას NBA-ის ჩემპიონობა მიულოცა და პრეზიდენტის სახელით შემდგომი წარმატებები უსურვა.
მათივე ცნობით, ზაზა ფაჩულიამ მადლობა გადაუხადა პრეზიდენტს და აღნიშნა, რომ ეს სახელმწიფო ჯილდო მისთვის დიდი პატივია
კვირის ბოლოდან ზაზა ფაჩულია საქართველოს ნაკრებთან ერთად, ევრობასკეტისთვის მზადებას დაიწყებს.
აღსანიშნავია, რომ სპორტსმენი საქართველოში NBA-ის თასით ჩამოვიდა.
საქართველოში ჩამოსვლა და თასის ჩამოტანა ზაზა ფაჩულიამ ჩემპიონობის მოპოვებისთანავე გადაწყვიტა. მან თამაშს შემდეგ გულშემატკივარს Facebook live-ის მეშვეობით მიმართა და თავისი ემოციები გამოხატა:
“სიტყვები არ მყოფნის, ეს ჩემთვის დაუვიწყარი დღეა. მადლობელი ვარ, რომ მომეცა საშუალება ჩემი ქვეყანა წარმედგინა. გილოცავთ ყველას, დიდი მადლობა ყველას, ვინც გვერდში მედექით. რთული სეზონი იყო, მაგრამ ჩვენ მაინც გავიმარჯვეთ. ძალიან ბედნიერი ვარ, რომ ქართველი ვარ, ამას ყოველთვის ვიტყვი. საქართველოში თასი და ბეჭედი ჩამოვა!”
