საავიაციო მოვლენათა ნებაყოფლობითი და სავალდებულო შეტყობინებები წარმოადგენს საავიაციო უსაფრთხოების დონის ამაღლების მნიშვნელოვან მექანიზმს, რომელიც ავსებს საავიაციო დარგის ტექნიკური და სამართლებრივი რეგულირების, ასევე მუდმივი ზედამხედველობის (სერტიფიცირება, გეგმიური/არა გეგმიური ინსპექტირებები) არსებულ მექანიზმებს.
საავიაციო მოვლენა - ეს არის საავიაციო შემთხვევა, სერიოზული ინციდენტი ან ინციდენტი, აგრეთვე, საჰაერო ხომალდის და/ან მისი სისტემის გაუმართაობა, სააერნაოსნო მომსახურების გაწევისას გამოყენებული სისტემების და ტექნიკური საშუალებების მტყუნება ან სხვა სახის უჩვეულო ვითარება, რომელმაც ზემოქმედება მოახდინა ან რომელსაც შეეძლო ზემოქმედება მოეხდინა ფრენის უსაფრთხოებაზე.
საქართველოს ეკონომიკისა და მდგრადი განვითარების სამინისტროს სამოქალაქო ავიაციის სააგენტომ რეგიონში ერთ-ერთი პირველმა დანერგა საავიაციო მოვლენათა შეტყობინების წესი ევროკავშირის რეგულაციის მოთხოვნების შესაბამისად (EU Reg. 376/2014). წესი 2014 წლის 1 ივლისს ამოქმედდა და მისი მიზანია საავიაციო შემთხვევებისა და ინციდენტების პრევენცია და საქართველოს საავიაციო უსაფრთხოების დონის გაუმჯობესება - საავიაციო მოვლენის შესახებ ნებაყოფლობითი და სავალდებულო შეტყობინებების მიღების, დამუშავების, შეფასებისა და გაცვლის გზით.
2014 წლის 1 ივლისიდან დღემდე, ნებაყოფლობითი და სავალდებულო შეტყობინებების გზით სამოქალაქო ავიაციის სააგენტოში შემოსულია 900-ზე მეტი შეტყობინება. აქედან, პრევენციული ღონისძიებები გატარდა ყველა იმ შეტყობინების მიმართ, რომელსაც მიენიჭა საავიაციო მოვლენის კლასიფიკაცია ან რომელთა შესახებ შეტყობინებები ატარებდნენ განმეორებით ხასიათს.
აღსანიშნავია, რომ ავიასაწარმოების მხრიდან სააგენტოში სავალდებულო შეტყობინებების გამოგზავნის მაჩვენებლები ბოლო წლებში გაუმჯობესებულია. საავიაციო შეტყობინებათა რიცხვის ზრდა არ უნდა იქნეს აღქმული როგორც საავიაციო უსაფრთხოების მხრივ ვითარების გაუარესება, პირიქით, აღნიშნული მიუთითებს, რომ ხდება ყველა შემთხვევის დაფიქსირება, ანალიზი და მოკვლევა, აღნიშნული აგრეთვე მეტყველებს შეტყობინების გამომგზავნთა მიმართ არადამსჯელობითი გარემოს განვითარებაზე ავისაწარმოებში, რაც სამოქალაქო ავიაციის სააგენტოს აუცილებელი მოთხოვნაა.
სააგენტოში დაცული მონაცემთა ბაზა თავსებადია ევროგაერთიანების საავიაციო მოვლენათა შეტყობინების (ECCAIRS) მონაცემთა ბაზასთან, რაც მნიშვნელოვნად ამაღლებს საავიაციო მოვლენათა შეგროვების, ანალიზის, გაცვლისა და დაცულობის ხარისხს.
ავიასაწრმოებში დასაქმებული პირებისათვის საავიაციო მოვლენათა შეტყობინება სავალდებულოა. ამისათვის მათ უნდა გადმოტვირთონ შესაბამისი ფორმა (www.gcaa.ge/geo/mandatory.php), შეავსონ საჭირო ველები, შეინახონ და ფორმაში მითითებულ მისამართზე გადმოაგზავნონ სამოქალაქო ავიაციის სააგენტოში.
რაც შეეხება ნებაყოფლობით შეტყობინებას, თითოეულ თქვენგანს შეუძლია შეატყობინოს სააგენტოს საავიაციო მოვლენის შესახებ, რომლის მომსწრეც აღმოჩნდით. ამისათვის დაგვიკავშირდით კომუნიკაციის ნებისმიერი თქვენთვის ხელმისაწვდომი საშუალებით (ტელ: +995 236 40 51; ფაქსი: +995 236 40 51, +995 294 80 02, ელ.ფოსტა: safety@gcaa.ge) ან შეავსეთ ნებაყოფლობითი შეტყობინების ფორმა (www.gcaa.ge/geo/voluntary.php) ჩვენს ვებ-გვერდზე www.gcaa.ge.
გახსოვდეთ, რომ სააგენტო სავალდებულო და ნებაყოფლობითი შეტყობინებებით მიღებულ ინფორმაციას იყენებს მხოლოდ საავიაციო უსაფრთხოების დონის ამაღლების მიზნით და ატარებს ყველა აუცილებელ ღონისძიებას, საავიაციო მოვლენის შეტყობინებით მიღებული ინფორმაციის კონფიდენციალურობის დასაცავად, რაც გულისხმობს ინფორმაციის მიმწოდებელი პირის პირადი მონაცემების ანონიმურობის უზრუნველყოფას.
საავიაციო მოვლენათა შეტყობინება ერთი კონკრეტული მიმართულებაა იმ უამრავ მიმართულებას შორის რომელსაც მოიცავს სამოქალაქო ავიაცია მგზავრებისა და ფრენების უსაფრთხოების უზრუნველყოფის კუთხით. აღნიშნული და უსაფრთხოების სხვა მექანიზმების სრულყოფა და გაუმჯობესება მუდმივ პროცესს წარმოადგენს. სამოქალაქო ავიაცია ტექნიკურად და სამართლებრივად ყველაზე რეგულირებული, პროგრესირებადი, მუდმივ ზედამხედველობას დაქვემდებარებული, დეტალებამდე გაწერილი და შესწავლილი სატრანსპორტო დარგია.
