ავიაკომპანია Wizz Air-მა, რომელსაც 1-ელ აგვისტოს მემინგენი/მიუნხენ-ვესტიდან ქუთაისის მიმართულებით ავიარეისი უნდა განეხორციელებინა, გააუქმა. მგზავრები ქუთაისის საერთაშორისო აეროპორტის Facebook-ზე წერდნენ, რომ W6 6410 რეისი მოულოდნელად გაუქმდა და ავიაკომპანიამ ისინი უყურადღებოდ დატოვა.
საქართველოს აეროპორტების გაერთიანებაში, აღნიშნული რეისის გადადების მიზეზად მემინგენში უამინდობას ასახელებენ. გაერთიანებაში აცხადებენ, რომ ისინი ავიაკომპანიის წარმომადგენლობას დაუკავშირდნენ და მათი თქმით, მგზავრების ნაწილს ბილეთის საფასური უკან დაუბრუნდა, ნაწილს კი ბილეთები გადაუცვალეს. მათივე ცნობით, ავიაკომპანიამ მგზავრების სასტუმროში დაბინავებაც უზრუნველყო.
აღსანიშნავია, რომ ევროკავშირის რეგულაცია N261/2004 შესაბამისად, საჰაერო ხომალდში ჩასხდომაზე უარის თქმის, ფრენის გაუქმების, ან ხანგრძლივი დაგვიანების შემთხვევაში, მგზავრებს უფლება აქვთ მოითხოვონ კომპენსაცია და დახმარების აღმოჩენა ავიაგადამზიდავისგან.
