ირლანდიურმა „ლოუკოსტერმა“ Ryanair-მა 2019 წლის ზაფხულიდან დიდი ბრიტანეთის მიმართულებით შესაძლოა რეისების რაოდენობა შეამციროს, ან საერთოდ შეწყვიტოს. ეს იმ შემთხვევაში მოხდება თუ კი გაერთიანებული სამეფო ევროკავშირთან ავიამიმოსვლის საკითხებს არ შეათანხმებს და არ დაარეგულირებს.
აღნიშნულის შესახებ განცხადება Ryanair-ის ხელმძღვანელმა მაიკლ ოლირიმ დიდი ბრიტანეთის ტრანსპორტის მინისტრთან შეხვედრის შემდეგ გააკეთა.
როგორც Express წერს, Ryanair-ი მოითხოვს, რომ დიდმა ბრიტანეთმა და ევროკავშირმა ხელი მოაწერონ შეთანხმებას „ღია ცის“ შესახებ, ან რაიმე სხვა მსგავს დოკუმენტს არაუგვიანეს 2018 წლის სექტემბერ-ოქტომბრისა.
„სხვა სათადარიგო ვარიანტი არ არსებობს. დიდი ბრიტანეთის ხელისუფლებას გეგმა არ აქვს. ჩვენ დეტალები 2018 წლის სექტემბერ-ოქტომბერში უნდა ვიცოდეთ, წინააღმდეგ შემთხვევაში რეისების რაოდენობას შევამცირებთ ან საერთოდ გავაჩერებთ. ჩვენ ვფიქრობთ, რომ 2019 წლიდან დიდი ბრიტანეთის მიმართულებით ფრენების შეჩერება მოგვიწევს“, აღნიშნა მაიკლ ოლარიმ.
აღსანიშნავია, რომ ევროკავშირში რეგისტრირებულ ავიაკომპანიებს დიდი ბრიტანეთის მიმართულებით ფრენებზე პრობლემები Brexit-ის გამო წარმოექმნათ.
