საქართველოს სამოქალაქო ავიაციის სააგენტოში მიმდინარე ევროკავშირის საჯარო დაძმობილების (Twinning) პროექტი - „საქართველოს საავიაციო კანონმდებლობის დაახლოვება ევროკავშირის სტანდარტებთან“ აქტიურ ფაზაშია. პროექტის მხარდაჭერით, სააგენტოს სპეციალისტები რამდენიმე სასწავლო ვიზიტით ხორვატიის სამოქალაქო ავიაციის სააგენტოში (CCAA) იმყოფებოდნენ. პრაქტიკული სწავლებების მიზანს, ხორვატიის, როგორც ევროკავშირის წევრისა და „ერთიანი საჰაერო სივრცის შესახებ შეთანხმების“ ხელმომწერი ქვეყნის გამოცდილების გაზიარება და ევროკავშირის რეგულაციების დანერგვის კუთხით ხორვატიის საავიაციო ხელისუფლების მუშაობის ადგილზე შესწავლა წარმოადგენდა.
სასწავლო ვიზიტების ფარგლებში, მხარეებმა შემდეგი საკითხები განიხილეს: საავიაციო უსაფრთხოების მართვის სისტემა (SMS), სამოქალაქო ავიაციის უსაფრთხოების უზრუნველყოფის პროგრამა (SSP), სამოქალაქო ავიაციის უსაფრთხოების მუდმივმოქმედი კომისიის მუშაობის პრინციპები, ჩართული უწყებების როლი და უფლებამოსილებები, რისკების მართვა, საავიაციო მოვლენათა შეტყობინების სისტემა და მასთან დაკავშირებული ევროკავშირის რეგულაცია 376/2014, ხორვატიის სამოქალაქო აეროდრომების ეროვნული მოთხოვნებიდან ევროკავშირის რეგულაციის (139/2014) მოთხოვნებზე გადასვლის პროცესი, ადგილობრივი დანიშნულების აეროდრომებისათვის წაყენებული მოთხოვნები, მიწისზედა მომსახურების („ჰენდლინგი“) დარეგულირება და ზედამხედველობა, საჰაერო მოძრაობის მეთვალყურეთა სერტიფიცირების სტანდარტები, მათი სწავლების, საჰაერო მეთვალყურეთა სასწავლო დაწესებულებების მიმართ წაყენებული მოთხოვნები (რეგულაცია 2015/340), თანმდევი შიდა პროცედურები და ა.შ..
ხორვატიის სამოქალაქო ავიაციის სააგენტო (CCAA) ავსტრიის საავიაციო ხელისუფლებასთან (Austrocontrol) ერთად, წარმოადგენს საქართველოს სამოქალაქო ავიაციის სააგენტოში მიმდინარე „Twinning“-ის პროექტის განმახორციელებელ პარტნიორ უწყებას, რომელსაც გააჩნია წარმატებული გამოცდილება „ერთიანი საჰაერო სივრცის“ შესახებ შეთანხმების ვალდებულებების შესრულების და დროის მოკლე პერიოდში ევროპული საავიაციო კანონმდებლობის დანერგვის კუთხით.
ევროკავშირის პროექტი - “საქართველოს საავიაციო კანონმდებლობის დაახლოება ევროკავშირის სტანდარტებთან” მიზნად ისახავს ქვეყანაში მოქმედი საავიაციო კანონმდებლობის სრულყოფას და მისი ევროკავშირის მოთხოვნებთან შესაბამისობაში მოყვანას, ასევე, სამოქალაქო ავიაციის სააგენტოს სტრუქტურულ და ინსტიტუციონალურ გაძლიერებას.
პროექტის მიმდინარეობის შესახებ დეტალური ინფორმაციის მისაღებად, ეწვიეთ ოფიციალურ ვებგვერდს: www.aviation-twinning.eu
