ავიაკომპანია Lufthansa-ს Airbus A340-300-ზე, რომელიც ასრულებდა რეისს ბოგოტა-ფრანკფურტი, 38 წლის ბულგარელმა ქალმა იმშობიარა. მას შემდეგ რაც ქალს მშობიარობა დაეწყო, ბორტგამცილებლებმა გვერდით მჯდომებს სთხოვეს ადგილი შეეცვალათ და იქვე იმპროვიზებული სამშობიარო დარბაზი მოაწყვეს. თვითმფრინავის ბორტზე, 191 მგზავრს შორის 3 ექიმიც აღმოჩნდა, რომლებმაც მშობიარობა მიიღეს.
პროცესმა გართულებების გარეშე ჩაიარა. ბიჭუნა ატლანტიკის თავზე, 11 800 მეტრის სიმაღლეზე დაიბადა. დედამ ბავშვს ნიკოლა დაარქვა, ერთ-ერთი ექიმის პატივსაცემად. დამატებითი სამედიცინო პროცედურების ჩასატარებლად პილოტებმა თვითმფრინავი მანჩესტერში დასვეს.
ამის შემდეგ კი თვითმფრინავმა გეზი ფრანკფურტის მიმართულებით აიღო. სტატისტიკური ინფორმაციის მიხედვით, 1965 წლიდან დღემდე Lufthansa-ს ბორტზე 11 ბავშვი დაიბადა.
