თბილისის მერიის ზედამხედველობის საქალაქო სამსახურის განცხადებით, წერეთლის გამზირზე მდებარე ობიექტზე არქიტექტურის სამსახურის მიერ შპს ,,როიალ გროუფზე’’ მშენებლობის ნებართვა 2016 წლის თებერვალში გაიცა.
მათივე განცხადებით, არსებული კანონმდებლობით და სანებართო მოწმობით მშენებლობის უსაფრთხოებაზე პასუხიმგებლობა ეკისრება მშენებლობის დამკვეთს.
განცხადებას, რომელიც თბილისის მერიის ზედამხედველობის საქალაქო სამსახურმა დიდუბეში მომხდარ უბედურ შემთხვევასთან დაკავშირებით გაავრცელა „ჯი-ეიჩ-ენი“ უცვლელად გთავაზობთ:
„აკაკი წერეთლის გამზირზე N35-37-39 ში მდებარე ობიექტზე არქიტექტურის სამსახურის მიერ შპს ,,როიალ გროუფზე’’ 2016 წლის თებერვალში გაცემულ იქნა მშენებლობის ნებართვა. არსებული კანონმდებლობით და სანებართო მოწმობით მშენებლობის უსაფრთხოებაზე პასუხიმგებლობა ეკისრება მშენებლობის დამკვეთს - შპს (,,როიალ გროუფს’’). ობიექტი იყო გაჩერებული და არ მიმდინარეობდა მშენებლობა. სამშენებლო სამუშაოები დაიწყო რამდენიმე დღის წინ. ზედამხედველობის სამსახურის სპეციალისტების მიერ 24.07.2017-ში გაფრთხილება მიეცა მშენებლობის დამკვეთს და დაევალა სანებართვო მოწმობით გათვალისწინებული პირობების შესრულება - (მშენებლობის ორგანიზების პროექტის შესაბამისად მშენებლობის (დემონტაჟის) განხორციელება, უსაფრთხოების ნორმების დაცვით. სამსახურის მიერ გაცემულია ოფიციალური აქტი (მითითება) და მიმდინარეობს საქმის წარმოება სამშენებლო სამართალდარღვევასთან დაკავშირებით. აღნიშნულ საქმეზე დაწყებულია გამოძიება, რომელიც დაადგენს უბედური შემთხვევის გამომწვევ მიზეზებს“,- აღნიშნულია განცხადებაში.
შეგახსენებთ, რომ დიდუბეში, შენობის დემონტაჟისას ერთი მუშა გარდაიცვალა და რამდენიმე დაშავდა.
შემთხვევა იტალიურ ეზოში ავარიული კორპუსის კედელი ჩამოიშლის შემდეგ მოხდა.
დაშავებულთაგან ორი ალადაშვილის სახელობის კლინიკაში, ერთ-მიხაილოვის საავადმყოფოში გადაიყვანეს.
მომხდარზე გამოძიება სისხლის სამართლის კოდექსის 240-ე მუხლის მეორე ნაწილით მიმდინარეობს, რაც სამთო, სამშენებლო ან სხვა სამუშაოს წარმოებისას უსაფრთხოების წესის დარღვევას გულისხმობს, რამაც გამოიწვია ადამიანის სიცოცხლის მოსპობა ან სხვა მძიმე შედეგი.
