სამოქალაქო მოძრაობის წარმომადგენლებმა საოკუპაციო ხაზთან პატრულირების გრაფიკი და სამოქმედო არეალი შეიცვალეს. ეს გადაწყვეტილება მათ შსს-ს წარმომადგენლებთან შეხვედრის შემდეგ მიიღეს.
კერძოდ, რისკების გათვალისწინებით და უსაფრთხოების ნორმებიდან გამომდინარე, 3-კაციანი ჯგუფები დილის 6-დან საღამოს 8 საათამდე ყარაფილა-ხურვალეთის მონაკვეთზე ავტობანის ზედა ნაწილიდან განახორციელებენ პატრულირებას.
საოკუპაციო ძალების ან ტექნიკის გადაადგილების, სადემარკაციო სამუშაოების შემთხვევაში აქტივისტები ინფორმაციას საზოგადოებას, მედიასაშუალებებს და დიპკორპუსს მიაწვდიან.
აქტივისტები დღეს, დილიდან შეიკრიბნენ სოფელ ყარაფილასთან. მოძრაობის ორგანიზატორების განცხადებით, მათი ინიციატივა მხოლოდ სამშვიდობო ხასიათს ატარებს.
