„პრეზიდენტი სამძიმარს უცხადებს დღეს ერთ-ერთ მშენებლობაზე დაღუპული ახალგაზრდა მამაკაცის ოჯახს“, - ამის შესახებ გიორგი მარგველაშვილის პრესსპიკერმა, ეკა მიშველაძემ დღეს გამართულ ბრიფინგზე განაცხადა.
მიშველაძის თქმით, დღევანდელი ტრაგიკული ფაქტი კიდევ ერთხელ ცხადყოფს შრომის ინსპექციის შექმნის აუცილებლობას.
„სამწუხაროდ, ეს არ არის პირველი შემთხვევა, როდესაც საკუთარი საქმიანობის შესრულების დროს ადამიანები იღუპებიან. პრეზიდენტს არაერთხელ აღუნიშნავს, რაოდენ მნიშვნელოვანია უსაფრთხოების რეგულაციების გამკაცრება და დაცვა. მსგავსი ტრაგედიის თავიდან ასაცილებლად დამსაქმებელი ვალდებულია შექმნას ისეთი სამუშაო პირობები, სადაც საკუთარი თანამშრომლის სიცოცხლე და ჯანმრთელობა დაცული იქნება. პრეზიდენტის აზრით, დღევანდელი ტრაგიკული ფაქტი კიდევ ერთხელ ცხადყოფს შრომის ინსპექციის შექმნის აუცილებლობას“, - განაცხადა პრეზიდენტის პრესსპიკერმა.
