თბილისის საკრებულოს განათლებისა და კულტურის კომისიის თავმჯდომარის თამარ ტალიაშვილის ინიციატივით, თბილისის საჯარო ბაგა-ბაღების მედპერსონალმა კვალიფიკაციის ამაღლების კურსი გაიარა.
როგორც „ინტერპრესნიუსს“ თბილისის საკრებულოდან აცნობეს, თამარ ტალიაშვილმა ჯანმრთელობის დაცვისა და სოციალურ საკითხთა კომისიის თავმჯდომარესთან ირაკლი ფავლენიშვილთან, ბაგა-ბაღების მართვის სააგენტოს ხელმძღვანელთან თემურ თორდინავასთან და ირაკლი ციციშვილის სახელობის კლინიკის სამედიცინო დირექტორთან მაია ჩხაიძესთან ერთად თბილისის საჯარო ბაგა-ბაღების მედპერსონალს კვალიფიკაციის ასამაღლებელი სპეციალური კურსის გავლის შემდეგ სწავლების დამადასტურებელი სერთიფიკატები გადასცა.
გადამზადების სპეციალური კურსი თბილისის საბავშვო ბაგა-ბაღებში დასაქმებულმა ექთნებმა, თამარ ტალიაშვილის ინიციატივით, ირაკლი ციციშვილის სახელობის ბავშთა ახალ კლინიკაში გაიარეს.
როგორც საკრებულოს დეპუტატმა განაცხადა, თბილისის ბაგა-ბაღების მედპერსონალისთვის პირველად ჩატარდა მსგავსი სახის მასშტაბური კვალიფიკაციის ასამაღლებელი კურსები, რომელიც შეეხებოდა პირველად სამედიცინო დახმარებას, მედპერსონალს მიეწოდა როგორც თეორიული, ისე პრაქტიკული უნარ-ჩვევები. ექთნებმა მიიღეს ინფორმაცია თანამედროვე მედიცინაში აპრობირებული იმ ღონისძიებების შესახებ, რომელსაც უნდა მიმართონ დროის იმ მონაკვეთში, ვიდრე სასწრაფო სამედიცინო დახმარება გახდება ხელმისაწვდომი.
„ეს მიმართულებები არის ნაწილი სკოლამდელ დაწესებულებებში ბავშვების ჯანსაღი ზრდა-განვითარების სტრატეგიული ხედვისა. ჩვენი მიზანია, ბავშვთა ჯანსაღი განვითარების მაქსიმალური ხელშეწყობა, ამ მიმართულებით ჩვენ არაერთ ღონისძიებას ვატარებთ, მათ შორის ჩვენ თბილსის ბაგა-ბაღები დავაკომპლექტეთ ლოგოპედებით, ფსიქოლოგებითა და სპეცპედაგოგებით. ამჯერად კი ბაგა-ბაღში დასაქმებულ მედპერსონალს ჩაუტარდა კვალიფიკაციის ასამაღლებელი სპეციალური კურსი“, - განაცხადა თამარ ტალიაშვილმა.
ტრენინგს ციციშვილის კლინიკის ბავშვთა გადაუდებელი დახმარების განყოფილებას ხელმძღვანელი, ამერიკის გულის ასოციაციისა და ამერიკის ქირურგთა კოლეჯის სერტიფიცირებული ტრენერი პროფესორი ირინა წირქვაძე უძღვებდა.
