18 ივლისს, საქართველოს ფინანსთა სამინისტროს შემოსავლების სამსახურმა მსოფლიო საბაჟო ორგანიზაციასთან და გაერო-ს ნარკოტიკებისა და დანაშაულის წინააღმდეგ ბრძოლის ოფისთან ერთად, რეგიონულ შეხვედრას უმასპინძლა. შეხვედრა ,,თბილისი მარიოტში“ გაიმართა და მას უკრაინის, აზერბაიჯანის რესპუბლიკის, ავღანეთის ისლამური რესპუბლიკის, პაკისტანის ისლამური რესპუბლიკის, ყაზახეთის, ყირგიზეთის, ტაჯიკეთის და უზბეკეთისა საბაჟო ადმინისტრაციების ხელმძღვანელი პირები ესწრებოდნენ.
რეგიონული შეკრებაზე მსოფლიო საბაჟო ორგანიზაციისა და გაერო-ს ნარკოტიკებისა და დანაშაულის წინააღმდეგ ბრძოლის ოფისის ერთობლივი პროექტის - კონტეინერების კონტროლის პროგრამის ფარგლებში, რეგიონული და საერთაშორისო თანამშრომლობის საკითხები განიხილეს. სხვადასხვა ქვეყნის საბაჟო ადმინისტრაციების მეთაურებმა იმსჯელეს ინფორმაციის გაცვლასა და ერთობლივ ოპერაციებთან დაკავშირებულ ისეთ მნიშვნელოვან საკითხებზე, როგორიც ნარკოტიკებით ვაჭრობისა და სხვა უკანონო საქმიანობის აღმოსაფხვრელად, მაღალი რისკის მქონე ტვირთების იდენტიფიცირება, ლეგიტიმური ვაჭრობის ხელშეწყობა და ამ მხრივ საერთაშორისო თანამშრომლობა და პრაქტიკულ რეკომენდაციების გაზიარებაა.
,,საბაჟო ორგანოების, როგორც სახელმწიფო საზღვრის უსაფრთხოების ერთერთი ყველაზე მნიშვნელოვანი უწყების გამართულ და სწორად ორგანიზებულ საქმიანობას დიდი მნიშვნელობა აქვს. აქვე უნდა აღვნიშნოთ, რომ ქვეყნის შიგნით საზღვრის უსაფრთხოებაში ჩართულ სხვა უწყებებთან ურთიერთთანამშრომლობას განსაკუთერებული მნიშვნელობა აქვს, მაგრამ როცა საქმე ტრანსსასაზღვრო დანაშაულს ეხება, ამ შემთხვევაში გადამწყვეტი მნიშვნელობა სხვადასხვა ქვეყნების სამართალდამცველ უწყებათა კოორდინირებულ ქმედებებს ენიჭება. ვფიქრობ, გლობალური კონტეინერების კონტროლის პროგრამა კარგი პლატფორმაა ამ თანამშრომლობისთვის. მინდა ვისარგებლო შემთხვევით და სამსახურის სახელით, მადლობა გადავუხადო ჩვენს საერთაშორისო პარტნიორებს - მსოფლიო საბაჟო ორგანიზაციას, გაეროს ნარკოტიკებისა და დანაშაულის წინააღმდეგ ბრძოლის ბიუროს ამ შესაძლებლობისთვის“ - რეგიონულ შეხვედრაზე განაცხადა ფინანსთა სამინისტროს შემოსავლების სამსახურის უფროსის მოადგილემ, ვახტანგ ლაშქარაძემ.
კონტეინერების კონტროლის პროგრამის კოორდინატორებმა გაეროდან და მსოფლიო საბაჟო ორგანიზაციიდან ხაზგასმით აღინიშნეს, რომ პროგრამის განხორციელების მიზანია მასში ჩართული ქვეყნების მთავრობათა დახმარება წარმატებით განახორციელონ კონტეინერების კონტროლი, რაც თავის მხრივ უზრუნველყოფს ნარკოტრაფიკისა და სხვა უკანონო საქმიანობის თავიდან აცილებასა და ლეგიტიმური ვაჭრობის ხელშეწყობას. როგორც გაეროს ცენტრალური აზიის რეგიონულმა წარმომადგენელმა აშიტა მიტალმა აღნიშნა, საბაჟო სფეროში რეგიონული თანამშრომლობა უაღრესად მნიშვნელოვანია მაღალი რისკის მქონე ტვირთების ეფექტური კონტროლისთვის. ამასთან, კონტეინერების კონტროლის პროგრამა იძლევა საკმარის შესაძლებლობებს არალეგალური საქონლის წინააღმდეგ ბრძოლის სფეროში ეროვნული, რეგიონული და საერთაშორისო თანამშრომლობისათვის დასძინა მსოფლიო საბაჟო ორგანიზაციის ხელშეწყობისა და კანონშესაბამისობის დირექტორატის ხელმძღვანელმა ანა ჰინოიოსამ.
შეხვედრის თანაორგანიზატორები არიან: გაერო-ს ნარკოტიკებისა და დანაშაულის წინააღმდეგ ბრძოლის ოფისის წარმომადგენლობა ცენტრალურ აზიაში, გაეროს წარმომადგენლობები ავღანეთში და პაკისტანში, ასევე, გაეროს რეგიონული პროგრამა ავღანეთში და მეზობელ ქვეყნებში. კონტეინერების კონტროლის პროგრამის რეგიონული სეგმენტები ავღანეთში, შავი ზღვის რეგიონში, ცენტრალურ აზიასა და პაკისტანში. პროგრამას აფინანსებს კანადის, გერმანიის ფედერაციული რესპუბლიკის, იაპონიისა და აშშ მთავრობები.
