ბორისპოლის საერთაშორისო აეროპორტის ხელმძღვანელმა პაველ რიაბიკინმა, მედიასთან შეხვედრისას „ლოუკოსტერ“ Ryanair-თან მოლაპარაკებების განახლებაზე განაცხადა.
„მე ვეთანხმები პრემიერ-მინისტრს იმაში, რომ ლოუკოსტ-კომპანიები უკრაინულ ბაზარზე უნდა შემოვიდნენ და ამისათვის ნორმატიული ბაზა დასახვეწია. ჩვენ ვანახლებთ მოლაპარაკებებს Ryanair-თან ფორმატით „სამინისტრო- ბორისპოლის აეროპორტი- Ukraine Investment Promotion Office", - განაცხადა რიაბიკინმა.
შეგახსენებთ, რომ გუშინ, 12 ივლისს უკრაინის ინფრასტრუქტურის მინისტრმა ვლადიმირ ომელიანმა მინისტრთა კაბინეთის წინაშე ბორისპოლის საერთაშორისო აეროპორტის დირექტორის მოხსნის საკითხი დააყენა.
გავრცელებული ინფორმაციის მიხედვით, ქვეყნის პრემიერ-მინისტრმა ვლადიმერ გროისმანმა უკრაინის ეროვნულ ანტიკორუფციულ ბიუროს დაავალა Ryanair-თან გამართული მოლაპარაკებები, არსებულ კანონმდებლობასთან მიმართებაში შეაფასოს. პრემიერ-მინისტრმა Ryanair-თან მოლაპარაკებების განახლების აუცილებლობაზეც ფგაამახვილა ყურადღება.
