,,ევროპული საქართველოს“ წევრი ზვიად ხორგუშვილი გაზრდილ სახელმწიფო ვალზე საუბრობს. მისი თქმით, საქართველოში, ყოველ ახალშობილს უკვე 3 750 ლარი ვალი აქვს.
,,ქართული ოცნება განაგრძობს ვალების აღებას. 2016 წელს ვალმა 15 მილიარდ ლარს გადააჭარბა, ხოლო ეკონომიკასთან მიმართებაში თითქმის 45.6% იყო. ქართულმა ოცნებამ გააორმაგა ქვეყნის საშინაო ვალი. ეს ყველაფერი კი გაზრდილ გადასახადებს ნიშნავს.
საქართველოს საგარეო ვალი მთლიან შიდა პროდუქტთან 2004 წლიდან კლებით გამოირჩეოდა (გამონაკლისია წლები, როდესაც ადგილი ჰქონდა რუსეთთან ფართომასშტაბიან ომს და მსოფლიო ფინანსურ კრიზისს). ქართულმა ოცნებამ თავისი მავნებლური და უპასუხისმგებლო პოლიტიკით ბიუჯეტის ვალებით დაფინანსება გააგრძელა და ეკონომიკასთან მიმართებაში საგარეო და საშინაო ვალი მკვეთრად გაიზარდა. აღსანიშნავია ისიც, რომ სახელმწიფოს საკუთრებაში მყოფი ორგანიზაციების ბონდები და ვალები ჯამში დაახლოებით 12%-ს შეადგენს. ევროპული საქართველოს და სხვა მრავალი საერთაშორისო ორგანიზაცია მოუწოდებს მთავრობას, რომ ვალის დათვლის მეთოდოლოგიას გადახედოს, რადგან მოცემულ ვალებზეც პასუხისმგებლობა სწორედ მთავრობას ეკისრება, რაც იმას ნიშნავს, რომ შეიძლება ითქვას, სამთავრობო ვალი მშპ-ის 54%-ზე მეტია.
ევროპული საქართველო ქართულ ოცნებას მოუწოდებს უარი თქვას ვალების გაზრდის მავნე პრაქტიკაზე და მიმართოს დაბალანსებულ ფისკალურ პოლიტიკას. დაიწყოს ვალების გასტუმრება და იზრუნოს ქვეყნის მაკროეკონომიკურ პარემეტრებზე და მომავალ თაობებზე’’, - განაცხადა ზვიად ხორგუაშვილმა.
