უმსხვილესი ევროპული ავიაგადამზიდავი, „ლოუკოსტერი“ Ryanair-ი ბორისპოლის საერთაშორისო აეროპორტს ისეთ მოთხოვნებს უყენებს, რაც უკრაინის კანონმდებლობასთან მოდის წინააღმდეგობაში. აღნიშნულის შესახებ განცხადება აეროპორტის გენერალურმა დირექტორმა პაველ რიაბიკინმა პრესკონფერენციაზე გააკეთა.
„პირველი, ისინი მოითხოვენ, რომ სადაო საკითხები ლონდონის საარბიტრაჟო სასამართლომ განიხილოს, ლონდონის კანონმდებლობით. ჩვენ კი მოვითხოვთ, რომ სადაო საკითხების გადაწყვეტა უკრაინული სასამართლოს სხვადასხვა ინსტანციებში მოხდეს“, განაცხადა აეროპორტის გენერალურმა დირექტორმა.
იმავდროულად, რიაბიკინმა „ლოუკოსტერის“ რიგ მოთხოვნებზეც გაამახვილა ყურადღება, რაც მისი თქმით, უკრაინულ კანონმდებლობას ეწინააღმდეგება.
მათ შორისაა უფასო აერონავიგაცია, სარეგისტრაციო დახლი, ტაქსების ავტოსადგომი, სარეკლამო ადგილი, ბილეთების გაყიდვის ოფისი, მოთხოვნა აეროპორტის მხრიდან 60 დღიან კრედიტირებასა და მათთვის duty free-დან შემოსული მოგების 35%-ის გადახდაზე.
შეგახსენებთ, რომ რამდენიმე თვის უკან ცნობილი გახდა, რომ Ryanair-ი კიევიდან ოთხი მიმართულებით გეგმავდა რეისებს.
ბორისპოლის საერთაშორისო აეროპორტმა 5 ივლისს ხელია მოაწერა ხელშეკრულებას და ის
Ryanair-ის სათაო ოფისს გადაუგზავნა. თუმცა როგორც შემდეგ გაირკვა, ავიაკომპანია აეროპორტის პირობებს არ ეთანხმება.
