სამედიცინო ცენტრი „ელიტი“ სამედიცინო ტურიზმზეა ორიენტირებული. მენეჯმენტმა შესაბამისი ინფრასტრუქტურის განვითარების მიზნით 1 მლნ დოლარის ინვესტიცია უკვე განახორციელა და პაციენტებს სთავაზობს როგორც სამედიცინო სერვისს, ასევე საკუთარი სასტუმრო Ok Georgia-ს მომსახურებას და ტურის დაგეგმვის სერვისს.
კლინიკა „ელიტის“ დამფუძნებელი ზურაბ გერსამია მიიჩნევს, რომ საქართველოში სამედიცინო ტურიზმის განვითარების დიდი შესაძლებლობები აქვს.
„ელიტი“ ორიენტირებული სამედიცინო ტურიზმზე, ჩვენთან სამკურნალოდ ჩამოდიან სხვადასხვა ქვეყნიდან. ვიყენებთ მოწინავე თანამედროვე ტექნოლოგიებს და ამის ფონზე მომხმარებელს ვთავაზობთ კონკურენტუნარიან ფასებს სხვა ქვეყნების სამედიცინო კლინიკებთან შედარებით“, - განმარტავს გერსამია.
„ელიტი“ ერთგვარი სამედიცინო კომპლექსია, რომელიც აერთიანებს სამედიცინო ცენტრს, კოსმეტოლოგიურ ცენტრს, სასტუმროსა და ტურისტულ მომსახურებას.
სასტუმროში დაცულია უსაფრთხოების ნორმები და შეესაბამება საერთაშორისო სტანდარტებს.
„უცხოელ პაციენტს კომფორტულად შეუძლია ჩამოსვლა და მიიღოს შესაბამისი მომსახურება. ჩვენ ვთანამშრომლობთ და მუდმივად ვაფართოებთ პარტნიორ ტურისტულ კომპანიათა ქსელს. ჩვენი ცენტრი სთავაზობს მსურველებს სტომატოლოგიურ და სარეაბილიტაციო ცენტრის მომსახურებას, გვაქვს ესთეტიკის მიმართულებაც. რაც შეეხება ჩვენს უპირატესობას შეგვიძლია ვთქვათ, რომ მთელ მსოფლიოში თანამედროვე სამედიცინო სერვისი ძვირია, საქართველოს კონკურენტუნარიანობა სწორედ ფასია, შესაბამისად, ქვეყანაში არის უცხოელი პაციენტების მხრიდან მოთხოვნა და სამედიცინო ტურისტული მიმართულების განვითარების შესაძლებლობა არის“, - განმარტავს გერსამია.
მისივე თქმით, „ელიტის“ პაციენტებს შორის არიან პაციენტები მეზობელი ქვეყნებიდან, რუსეთიდან, სომხეთიდან, აზერბაიჯანიდან, თუმცა ასევე ჰყავთ პაციენტები ევროპის ქვეყნებიდან, კანადიდან და აშშ-დანაც კი.
გერსამია ამბობს, რომ სისტემა „ელიტს“ უკვე კარგად აქვს გამართული. უცხოელი პაციენტები მონაცემებს წინასწარ აგზავნიან, პაციენტი იღებს წინასწარ შედგენილ ხარჯებს და დაგეგმილ ტურს.
სამედიცინო ტურიზმის განვითარების პერსპექტივასთან დაკავშირებით, გერსამია მიიჩნევს, რომ საქართველოს ძირითადი უპირატესობა უმეტესად ფასია და მომსახურების ხარჯები სხვა ქვეყნების შეთავაზებებს 5-6-ჯერ ჩამორჩება.
„ელიტი“ ტექნოლოგიების მუდმივად განახლებაზეა ორიენტირებული. თანამშრომლობს ისრაელისა და გერმანული კომპანიებთან.
სექტემბრიდან „ელიტი“ უცხოელ პაციენტებს სიახლეს სთავაზობს და მათ უკვე შესაძლებლობა ექნებათ განახლებული, ციფრული სტომატოლოგიური მომსახურებით ისარგებლონ. ასევე მენეჯმენტი ახალი მიმართულებით გააქტიურებასაც გეგმავს, საქმე ეხება ბავშვთა სამედიცინო ცენტრის გახსნას, რომლიც ძირითადი მიზანი ფსიქოლოგიური წნეხის მოხსნა იქნება. როგორც გერსამია ამბობს, ეს მთელ მსოფლიოში მკურნალობის მიღებული ფორმაა.
კლინიკა „ელიტი“ 2003 წელს შეიქმნა.2012 წელს კლინიკა „ელიტს“ მიენიჭა ISO-ს საერთაშორისო სერტიფიკატი, რაც თავისთავად ნიშნავს მაღალკვალიფიციურ მკურნალობას და სტომატოლოგიური ინსტრუმენტების სტერილიზაციას ევროპული სტანდარტების მიხედვით.
"ელიტი" ახალი მიმართულების განვითარების მიზნით კონტაქტების დამყარებას აქტიურად ცდილობს. ამ მიზნით კომპანია წარმოდგენილი იყო თბილისში გამართულ სამედიცინო ტურიზმის სემინარზე, რომელიც თურქრული ორგანიზაცია Turkish Healthcare Travel Council-მა გამართა. ღონისძიება B2B ფორმატში გაიმართა და "ელიტი" თურქული კომპანიების შეთავაზებებს გაეცნო და მზად არის და გაიზიაროს თურქული კომპანიის გამოცდილება.
Turkish Healthcare Travel Council-ი 2005 წელს დაარსდა და მას წარმომადგენლობა მსოფლიოს 90 ქვეყანაში აქვს, მათ შორის საქართველოშიც. საქართველოში Turkish Healtcare Travel Council-ის ექსკლუზიური პარტნიორია კომპანია BE FREE, რომელიც ქართველ პაციენტებს თურქეთში შეღავათიანი ტარიფებით მკურნალობას სთავაზობს. ტურისტული კომპანია BE FREE 6 თვის წინ გაიხსნა, ის საქართველოს ბაზარზე დიდი გამოცდილების მქონე ტურისტული კონმპანია Wonderland-ის შვილობილია, რომელიც იმავდროულად საქართველოში Turkish Healtcare Travel Council-ის წარმომადგენელიცაა.
BE FREE ორიენტირებულია სამედიცინო ტურიზმზე და მისი მიზანია, პაციენტების გაგზავნა თურქეთის სხვადასხვა წამყვან კლინიკაში.
Turkish Healthcare Travel Council-ი მარკეტინგულ კამპანიას მსოფლიოს სხვადასხვა ქვეყანაში აწარმოებს და სხვადასხვა ქვეყნის წარმომადგენლებსა და სამედიცინო ტურიზმით დაინტერესებულ კლინიკებს თურქეთის გამოცდილებას აცნობს და ვორქშოფებსა და სემინარებზე თურქეთშიც არაერთხელ ეპატიჟება.
