სასტუმრო „რედისონში“ ბიზნეს ფორუმი „Invest in Batumi” ჩატარდა. ფორუმი აჭარის მთავრობის თავმჯდომარემ ზურაბ პატარაძემ გახსნა. საინვესტიციო ფორუმის ფარგლებში ოფიციალური ვიზიტით აჭარაში ყაზახეთში მოქმედი ერთ-ერთი უმსხვილესი კომპანია „ყაზახ ინვესტის“ ხელმძღვანელი მეირჟან მაიკენოვი და ასტანაში სხვადასხვა მსხვილი კომპანიების წარმომადგენლები იმყოფებიან. კომპანია „ყაზახ ინვესტი“ ყაზახეთის ბაზარზე სამშენებლო სფეროში 50%-ით არის წარმოდგენილი.
აჭარის ეკონომიკური პარამეტრების და საინვესტიციო პოტენციალის შესახებ აჭარის ფინანსთა და ეკონომიკის მინისტრმა ისაუბრა და განაცხადა, რომ 2016 წელს აჭარაში 428 მლნ დოლარის ოდენობის კერძო ინვესტიცია განხორციელდა, საიდანაც 71% უცხოური ინვესტიციაა.
„2015 წლის ანალოგიურ მაჩვენებელთან შედარებით კერძო ინვესტიციები 17%-ით არის გაზრდილი. ინვესტირების კუთხით წამყვანი ენერგეტიკის (45%), ტურიზმის (32%) და მშენებლობის (21%) სექტორებია.
ბიზნეს სექტორის მაჩვენებლების მიხედვით დასაქმებულთა რაოდენობა, მიმდინარე წლის ბოლო მონაცემებით, 7,9% ით გაიზარდა, ბიზნესის ეკონომიკური აქტივობა და ბრუნვის მაჩვენებელი 12,9%-ით, ხოლო გამოშვებული პროდუქცია 11,1% ით.
აჭარის საინვესტიციო რესურსის მაქსიმალურად ათვისების მიზნით, სამინისტრო აქტიურად ამუშავებს კონკრეტულ საინვესტიციო წინადადებებსა და პროექტებს, რომელთა შორის გონიოს პოლიგონი, გმირთა ხეივანი, ქობულეთის ტურისტული ზონა განსაკუთრებით მნიშვნელოვანია. გმირთა ხეივანში 3 მიწის ნაკვეთის პრივატიზების მიზნით ელექტრონული აუქციონი უკვე გამოცხადებულია, საიდანაც ჩვენ დამატებით დაახლოებით 100 მლნ ლარის ინვესტიციის განხორციელებას ველოდებით“-განაცხადა რამაზ ბოლქვაძემ.
ფორუმზე რეგიონის საინვესტიციო შესაძლებლობებზე სპეციალური პრეზენტაცია აჭარის ფინანსთა და ეკონომიკის მინისტრის მოადგილემ კონსტანტინე მეგრელიშვილმა გამართა. ფორუმის მონაწილეებმა აჭარის საპრივატიზაციო ობიექტებზე, საქართველოში ბიზნესის დაწყების რეგულაციებზე, რეგიონის ეკონომიკის ძირითად პარამეტრებზე ინფორმაცია მიიღეს. სტუმრებს აჭარის უცხოენოვანი საინვესტიციო ვიდეო რგოლის ნახვის შესაძლებლობა მიეცათ.
შეხვედრაზე საუბარი კურორტი „გოდერძის“ საინვესტიციო შესაძლებლობებს შეეხო. პოტენციურმა ინვესტორებმა სამთო კურორტის პოტენციალის შესახებ დეტალური ინფორმაცია მიიღეს. კურორტი „გოდერძის“ განვითარება აქტიურად მიმდინარეობს. საპრივატიზაციო პროცესი უკვე დაწყებულია. უკვე შეიქმნა კურორტის განაშენიანების რეგულირების გეგმა, რომლის ფარგლებშიც ტერიტორიის განვითარება მოხდება.
აჭარის ფინანსთა და ეკონომიკის სამინისტროში საინვესტიციო წინადადებების მიღების პროცესი უკვე დაწყებულია, რომლის განხილვის შემდეგაც ელექტრონული აუქციონების გამოცხადების პროცესი დაიწყება. „გოდერძის“ განაშენიანების რეგულირების დოკუმენტით ტერიტორიის ზონირება განხორციელდა.
განსაზრღვრულია კონკრეტულ ტერიტორიებზე განსახორციელებელი ინფრასტრუქტურული პროექტების სახეები. განაშენიანების დოკუმენტი კურორტზე მაღალი დონის სასტუმროების, კოტეჯების, კვების ობიექტების და სხვა საზოგადოებრივი ცენტრების მოწყობას ითვალისწინებს.
ფორუმის ფარგლებში აჭარის სავაჭრო-სამრეწველო პალატასა და ყაზახურ საინვესტიციო სააგენტო „ყაზახ ინვესტს“ შორის ურთიერთთანამშრომლობის მემორანდუმი გაფორმდა. მემორანდუმი, ხელს შეუწყობს ქართველ მეწარმეებს შეუფერხებლად გაიტანონ თავიანთი პროდუქტი ყაზახურ ბაზრებზე. საინვესტიციო სააგენტო მეწარმეებს პარტნიორების მოძიებაში დაეხმარება, გარდა ამისა კონსულტაციებს გაუწევს საკანონმდებლო კუთხით, დაეხმარება საჭირო ლიცენზიების მოპოვებაში და ახალ ბაზრებზე გასვლაში.
ფორუმის მონაწილეებს აჭარის ტურიზმის და სოფლის მეურნეობის კუთხით არსებული პოტენციალის გაცნობის საშუალება მიეცათ.
ბიზნეს ფორუმს აჭარასა და ყაზახეთში სხვადასხვა სექტორში მოღვაწე კომპანიების წარმომამდგენლები ესწრებოდნენ. ფორუმის ფარგლებში ქართულ და ყაზახურ კომპანიებს შორის პირისპირ შეხვედრები გაიმართა,სადაც მხარეებს შორის საუბარი სამომავლო თანამშრომლობას შეეხო.
