განათლების მინისტრ ალექსანდრე ჯეჯელავას განცხადებით, სიცხე ნამდვილად პრობლემაა, მაგრამ გამოცდები სტრესია და სადაც არის კონდიციონერი, გულის წასვლის შემთხვევები იქაც ფიქსირდება.
აღნიშნული კომენტარი ჯეჯელავამ ჟურნალისტების იმ შეკითხვის საპასუხოდ გააკეთა, რომელიც საგამოცდო ცენტრებში სიცხის მიერ შექმნილ პრობლემებს ეხებოდა.
მინისტრი იმედოვნებს, რომ კონდინციონერი ყველა ცენტრში იქნება.
„სიცხე ნამდვილად პრობლემაა. გამოცდები სტრესია და სადაც არის კონდიციონერი, სამწუხაროდ, გულის წასვლის შემთხვევები იქაც ფიქსირდება. სამწუხაროდ, გამოცდების დაწყების პერიოდს დაემთხვა ტემპერატურის მნიშვნელოვანი ზრდა. ბოლო წლებში დავიწყეთ საგამოცდო ცენტრების თავმოყრა. იმედი გვაქვს, რომ ყველა ცენტრში გვექნება კონდიციონერი. რაც შეეხება იმ შემთხვევებს, როცა კონდიციონერს არ რთავენ, ზოგჯერ ადგილი აქვს ტექნიკურ პრობლემას. სამწუხაროდ, ზოგჯერ ისეთი ვითარება გვაქვს, რომ ის პირიქით ხელს უშლის რომელიმე აბიტურიენტს. ეს ის თემაა, რის გამოსწორებაზეც უნდა ვიმუშაოთ. რაც შეეხება ერთიან ეროვნულ გამოცდებს. ის გეგმიურად მიდის, სერიოზული ხარვეზები არ ფიქსირდება“, - განაცხადა ჯეჯელავამ.
