სასტუმრო „ჰოლიდე ინნ”-ში პროექტის „ნარჩენების მართვის კოდექსით განსაზღვრული „მწარმოებლის გაფართოებული ვალდებულების“ (მგვ) პრინციპის დანერგვის მხარდაჭერა“ პრეზენტაცია გაიმართა. შეხვედრის მონაწილეებს გარემოსა და ბუნებრივი რესურსების დაცვის მინისტრის მოადგილემ ეკატერინე გრიგალავამ და გაეროს ელჩმა საქართველოში ნილს სკოტმა მიმართეს.
ნარჩენების მართვის კოდექსი რიგ ახალ ვალდებულებებს აკისრებს როგორც საჯარო, ასევე კერძო სექტორის წარმომადგენლებს.
ერთ-ერთი ასეთი მოთხოვნაა „მწარმოებლის გაფართოებული ვალდებულების“ (მგვ) პრინციპის დანერგვა საქართველოში. კერძოდ, კოდექსის მე-9 მუხლის თანახმად, ისეთი პროდუქტის უშუალო მწარმოებლები და ბაზარზე განმათავსებლები, რომელიც შემდგომ სპეციფიკური ნარჩენი ხდება, ვალდებულნი არიან, უზრუნველყონ პროდუქტისგან წარმოქმნილი სპეციფიკური ნარჩენის გარემოზე უარყოფითი გავლენის შემცირება და ასეთი ნარჩენების აღდგენა/განთავსება.
პროექტი ინიცირებულია გარემოსა და ბუნებრივი რესურსების დაცვის სამინისტროს მიერ და მას ახორციელებს ორგანიზაცია „Georgia’s Environmental Outlook” – GEO, გაეროს განვითარების პროგრამის (UNDP) საქართველოში და შვედეთის მთავრობის ხელშეწყობით.
პრეზენტაციას სამთავრობო სტრუქტურების, საერთაშორისო, არასამთავრობო ორგანიზაციების, ბიზნეს ასოციაციების, სავაჭრო პალატების და კომპანიების 70-ზე მეტი წარმომადგენელი ესწრებოდა.
