თბილისის ვიცე-მერი, ლაშა აბაშიძე ადასტურებს, რომ ხანძრის გაჩენის შედეგად ერთი ადამიანი დაშავდა.

„დაშავებული არის, ერთი ადამიანი და საავადმყოფოშია გადაყვანილი,“ - აცხადებს ლაშა აბაშიძე.

მისი თქმით, ამჟამად მთავარი მიზანი ადამიანების უსაფრთხოების დაცვაა.

„მთავარი ამოცანა არის აქ, რომ უსაფრთხოება იყოს დაცული. არ მოხდეს ხალხის შესვლა და არ მივიღოთ ჯანმრთელობის დაზიანება. ამ ეტაპზე თითქმის 100 %-ით არის ლოკალიზებული ხანძარი და ჩვენ იმედი გავქვს, რომ ახალი კერა არ გაჩნდება“, - განაცხადა ლაშა აბაშიძემ.

ხანძრის ლოკალიზებას ადასტურებს შინაგან საქმეთა სამინისტრო. უწყების პრესსამსახურის უფროსი თეა პერტაიას ინფორმაციით, 150 მაშველი-მეხანძრის მყისიერი და ეფექტური მუშაობის შედეგად, ხანძარი ლოკალიზებულია.

თბილისში, აგლაძის ქუჩაზე, ე.წ. ელიავას ბაზრობის ტერიტორიაზე განთავსებულ ავტონაწილების მაღაზიაში  ხანძარი 2 ივლისს, დაახლოებით 21:00 საათზე გაჩნდა. ავტონაწილების მაღაზიაში გაჩენილი ხანძარი დაახლოებით 2500 კვ.მ-ზე გავრცელდა.