თბილისში ირლანდიის ლიმერიკის უნივერსიტეტმა, ევროკავშირის სამეზობლო პროგრამით სოფლის მეურნეობისა და სოფლის განვითარებისათვის საქართველოში (ENPARD) მხარდაჭერილი პროექტის „სოფლის მეურნეობის საგანმანათლებლო და კვლევითი ორგანიზაციების ინსტიტუციონალური გაძლიერება“ ფარგლებში, დასკვნითი კონფერენცია გამართა და პროექტის კვლევითი საქმიანობის შედეგები წარადგინა.
პროექტს ლიმერიკის უნივერსიტეტი, საქართველოს აგრარულ უნივერსიტეტთან და სოფლისა და სოფლის მეურნეობის პოლიტიკისა და განვითარების ინსტიტუტთან (RAPDI) პარტნიორობით, 2015 წლიდან ახორციელებს. პროექტის ფარგლებში განხორციელდა სასოფლო-სამეურნეო სექტორთან დაკავშირებული სხვადასხვა კვლევა, ჩატარდა სემინარები და ტრენინგები.
ღონისძიებაზე შედგა კვლევების პრეზენტაცია და განხილვა შემდეგ თემებზე: უწყვეტი განათლების მნიშვნელობა მეფუტკრეებისთვის და საქართველოს აგრარული უნივერსიტეტის როლი, თაფლის ღირებულების ჯაჭვის ანალიზი, შეღავათიანი აგროკრედიტის პროგრამის შეფასება, საქართველოს აგროსავაჭრო პოლიტიკის მიმოხილვა, საქართველოს სოფლის მეურნეობის მიმოხილვა 2006-2015 წლები. აღნიშნული კვლევები განთავსებულია ENPARD-ის ვებგვერდზე www.enpard.ge.
„ENPARD-ის ფარგლებში ევროკავშირი საქართველოს ეხმარება აკადემიურმა ინსტიტუტებმა სასოფლო-სამეურნეო კვლევითი საქმიანობა განავითარონ. ეს მხარდაჭერა გულისხმობს სოფლის მეურნეობის სექტორში ახალი ტექნოლოგიების დანერგვას, სასოფლო-სამეურნეო პროდუქტიულობის ზრდას და პოლიტიკის განვითარებას. ENPARD-ის პროექტით ლიმერიკის უნივერსიტეტმა თავისი წვლილი შეიტანა კვლევითი პროგრამების დანერგვაში და სექტორში ჩართული ექსპერტებისა და ფერმერების ცოდნის გაღრმავებაში”, - განაცხადა საქართველოში ევროკავშირის წარმომადგენლობის ატაშემ სოფლის მეურნეობის დარგში, კრისტინა კასელამ.
ევროკავშირი ხელს უწყობს სოფლად სიღარიბის შემცირებასა და სოფლის განვითარების თანამედროვე პრაქტიკის დანერგვას საქართველოში სოფლისა და სოფლის მეურნეობის განვითარების ევროპის სამეზობლო პროგრამის (ENPARD) დახმარებით. 2013-2019 წლებისათვის სოფლისა და სოფლის მეურნეობის განვითარების ევროპის სამეზობლო პროგრამის (ENPARD) ბიუჯეტი საქართველოში 102 მილიონ ევროს შეადგენს.
კონფერენცია გახსნა აგრარული უნივერსიტეტის პრორექტორმა, ნათია სამუშიამ. ღონისძიებას საქართველოს სოფლის მეურნეობის მინისტრის მოადგილეები გიორგი ხანიშვილი, გიორგი ჩხეიძე და იური ნოზაძე ესწრებოდნენ. ასევე, პროექტის კოორდინატორი ლიმერიკის უნივერსიტეტიდან ეიმონ მაკქუეიდი, საქართველოში ევროკავშირის წარმომადგენლობის, ENPARD-ის პარტნიორი ორგანიზაციების, ფერმერული ასოციაციების წარმომადგენლები და ექსპერტები.
