საქართველოს სავაჭრო-სამრეწველო პალატის მხარდაჭერით ქვეყანა „Good Govermence Fund“-ის ინიციატივის ფარგლებში სხვა და სხვა აქტივობების განხორციელებას იწყებს. ფონდის ერთ-ერთი მთავარი მიზანია  განვითარებადი ეკონომიკის მქონე ქვეყნების ბიზნეს-სექტორებს  პროდუქციის ევროპულ სტანდარტებთან შესაბამისობაში მოყვანაში დაეხმაროს. თანამშრომლობის დაწყებასთან დაკავშირებით დღეს, თბილისის ტექნოპარკში დოკუმენტს მოეწერა ხელი. დოკუმენტის მიზანია შესაფუთი მასალების მწარმოებელი კომპანიების პროდუქციის ევროპულ სტანდარტებთან გაიგივება, რათა მათ საშუალება ჰქონდეთ გავიდნენ ექსპორტზე ევროკავშირში და მიიღონ სარგებელი  ღრმა და ყოვლისმომცველი თავისუფალი ვაჭრობის შესახებ შეთანხმებისგან (DCFTA).

საქართველოს სავაჭრო-სამრეწველო პალატისა და PricewaterhouseCoopers (PWC)-Georgia-ს თანამშრომლობის შედეგად უკვე შეიქმნა შესაფუთი მასალების მწარმოებელ კომპანიათა ჯგუფი, რომელიც ინიციატივას უერთდება და საკუთარი პროდუქციის ხარისხის გაუმჯობესებისთვის ევროპელი პარტნიორების გამოცდილების გასაზიარებლად მზადაა.

პროექტის პირველ ეტაპზე,  28  ივნისს საქართველოს ეწვია ბრიტანეთის სურსათის შემფუთველთა ასოციაციის ხელმძღვანელი - მარტინ კერში, რომელმაც ჯგუფის წევრი კომპანიებისთვის  სავაჭრო-სამრეწველო პალატის ოფისში (ბერძნის ქ.29, თბილისი, საქართველო)  ტრენინგი ჩაატარა და მათ  გამოცდილება  Good Govermence Fund-ის ინიციატივის ფარგლებში უსასყიდლოდ  გაუზიარა.

იგივე მიზნით საქართველოს სავაჭრო-სამრეწველო პალატა მუშაობს ასევე სამშენებლო მასალების მწარმოებელი კომპანიების ჯგუფის შექმნაზეც.

Good Govermence Fund-ის იდეა ბრიტანეთის ყოფილ პრემიერს, დევიდ ქემერონს ეკუთვნის. დღეს ეს პროექტი პოლიტიკისა და  მენეჯმენტის საკონსულტაციო ჯგუფის (PMCG),  PricewaterhouseCoopers-ის,  Lucid Linx-ის, მოლდოველ ექსპერტთა ჯგუფისა  და ევროპის პოლიტიკის ცენტრის  (CEP)  მიერ ხორციელდება და ხელს უწყობს  მმართველობისა და ეკონომიკური რეფორმების ინიციატივებს უკრაინაში, მოლდოვაში, საქართველოში, სერბეთსა და ბოსნია-ჰერცეგოვინაში.

საქართველოს სავაჭრო-სამრეწველო პალატა Good Govermence Fund-ის ეროვნული კოორდინატორია. პროექტის ფარგლებში განხორციელებულ აქტივობებს მხარს უჭერს ბრიტანეთის საელჩო საქართველოში.