დღეს საზოგადოებრივი მაუწყებლის ცხოვრებაში ისტორიული დღეა, ვულოცავ თითოეულ თანამშრომელს, თითოეულ მოქალაქეს, - ამის შესახებ საზოგადოებრივი მაუწყებლის გენერალურმა დირექტორმა, ვასილ მაღლაფერიძემ სამეურვეო საბჭოს მიერ მაუწყებლის ტექნიკურ-მატერიალური გადაიარაღების გეგმის დამტკიცების შემდეგ განაცხადა.
როგორც მაღლაფერიძემ აღნიშნა, დღეიდან იწყება ტექნიკურად და შინაარსობრივად ახალი საზოგადოებრივი მაუწყებლის მშენებლობა.
„ცხადია, ახალი საზოგადოებრივი მაუწყებლის მშენებლობა იწყება ყველა იმ ტრადიციის შენარჩუნებით, რომელიც არსებობდა, მაგრამ ეს მთლიანად მორგებული იქნება კონკრეტულ დროსა და ეპოქაში არსებულ მოთხოვნებზე. სასიხარულოა, რომ სამეურვეო საბჭომ გეგმას ერთხმად დაუჭირა მხარი. ამაში ძალიან ბევრი და დაძაბული შრომაა ჩადებული. აქამდეც იყო მუშაობა დაწყებული და ჩვენმა ტექნიკურმა სამსახურმა ნამდვილად დიდი შრომა გასწია. ვფიქრობ, ყველა ერთად, ჩვენ, ჟურნალისტები მალე ვიხილავთ ახალ ტელევიზიას. ამას დაერთვება ახალი შენობა, ახალი იდეები. მაუწყებელში არსებული ყველა პრობლემა მალე ჩაბარდება წარსულს“, - აღნიშნა მაღლაფერიძემ.
საზოგადოებრივი მაუწყებლის სამეურვეო საბჭომ მაუწყებლის გრძელვადიანი მატერიალურ-ტექნიკური გადაიარაღების გეგმა ერთხმად დაამტკიცა.
