CNN –ის ინფორმაციით, აშშ-ის სამხედრო ხომალდები და თვითმფრინავები სირიაზე შესაძლო თავდასხმისთვის მზად არიან. გამოცემა ანონიმურ წყაროზე დაყრდნობით წერს, რომ ამერიკელი სამხედროები მუდმივად უთვალთვალებენ სირიაში მდებარე შაირათის ავიაბაზას. ვაშინგტონში ფიქრობენ, რომ ამ ბაზიდან ქიმიური თავდასხმის საშიშროება არსებობს.
27 ივნისს აშშ-ის პრეზიდენტის ადმინისტრაციამ სირია კიდევ ერთი ქიმიური თავდასხმის მომზადებაში დაადანაშაულა. თეთრმა სახლმა სირიის პრეზიდენტი ბაშარ ასადი გააფრთხილა, რომ თუკი ასეთ შეტევას განახორციელებს, მას და მის სამხედროებს ეს ძვირად დაუჯდებათ. შეერთებული შტატების ადმინისტრაციის განცხადებაში ნათქვამია, რომ სირიას 4 აპრილს მომხდარი ქიმიური თავდასხმის გამეორება აქვს დაგეგმილი.
