კლინიკა „ლანცეტის“ დამფუძნებელი ფარმან ჯეირანლი საქართველოს პრეზიდენტს ციხიდან წერილით მიმართავს და მისი საქმის პირად კონტროლზე აყვანას სთხოვს.
საქართველოს პრეზიდენტისთვის მიწერილ წერილში, ჯეირანლი ამბობს, რომ ის საქართველოში დაიბადა და გაიზარდა, თუმცა უმაღლესი განათლება სამედიცინო განათლება აზერბაიჯანში მიიღო.
„ლანცეტის“ დამფუძნებელი მის დაკავებას აზერბაიჯანის პოლიტიკურ დაკვეთასთას უკავშირებს.
"ბოლო პერიოდში განვითარებული მოვლენები მაძლევს საფუძველს, რომ ვიფიქრო, ჩემი დაკავება დაკავშირებულია პოლიტიკურ დაკვეთასთან აზერბაიჯანის რესპუბლიკიდან. ამის ერთ-ერთი მიზეზი ის არის, რომ აზერბაიჯანელი ოპოზიციურად განწყობილი წევრები უნდობლობას უცხადებენ ადგილობრივ სამედიცინო დაწესებულებებს და სხვადასხვა სამედიცინო გამოკვლევებზე და სამკურნალოდ მოგვმართავენ ჩვენს კლინიკა „ლანცეტს“. ყოველივე ზემოთაღნიშნულიდან თავს ვთვლი უკანონო პატიმრად და დარწმუნებული ვარ, რომ ჩემი თანამშრომლებიც არიან უდანაშულოები. გთხოვთ დაინტერესდეთ და პირად კონტროლზე აიყვანოთ ჩემი საქმე. საქმის ირგვლივ დეტალური ინფორმაციის მისაღებად თქვენს დაქვემდებარებაში არსებული შესაბამისი სამსახური დაუკავშირდეს ჩემს ადვოკატს, ბატონ გელა ნიკოლაიშვილს", - ნათქვამია წერილში.
ღვიძლის ტრანსპლანტაციის უკანონო ოპერაციების საქმეზე კლინიკა "ლანცეტის" ერთ-ერთი მფლობელი და დირექტორი ფარმან ჯეირანლი 22 მაისს დააკავეს.
ლინიკა „ლანცეტში“ ღვიძლის გადანერგვის სულ 2 ოპერაცია 2016 წლის მარტში ჩატარდა. ორივე ოპერაცია წარუმატებლად დასრულდა, ოპერაციიდან რამდენიმე დღეში გიორგი ჩუბინიძე და კარლო კეკელიძე გარდაიცვალნენ.
"ლანცეტის" დირექტორის წინააღმდეგ გამოძიება სისხლის სამართლის კოდექსის 180-ე მუხლით მიმდინარეობს, რაც თაღლითობას გულისხმობს და 6-დან 9 წლამდე პატიმრობას ითვალისწინებს.
