საქართველოს სავაჭრო-სამრეწველო პალატასთან არსებული საქართველოს საერთაშორისო საარბიტრაჟო ცენტრი (GIAC), ნავთობპროდუქტების იმპორტიორთა კავშირთან ერთად, 22 ივნისს სასტუმრო "Radison Blu Iveria”-ში, ნავთობპროდუქტების ბიზნეს-სექტორში მოღვაწე კომპანიებთან გამართავს სამუშაო შეხვედრას თემაზე , „არბიტრაჟი – სასამართლოს ეფექტური ალტერნატივა“.
ღონისძიება მიზნად ისახავს არბიტრაჟის, როგორც დავების გადაწყვეტის მექანიზმის შესახებ ცნობადობის ამაღლებას და მისი გამოყენებით დავების გადაწყვეტის უპირატესობების წარმოჩენას სასამართლოსთან შედარებით. ღონისძიებაზე განხილული იქნება არბიტრაჟში დავის განხილვის თავისებურებები საქართველოს საერთაშორისო საარბიტრაჟო ცენტრის მაგალითზე. ასევე, ყურადღება გამახვილდება უცხოელ პარტნიორებთან დავების პრევენციის მიზნით პრაქტიკული თავისებურებებისა და რეკომენდაციების განხილვას.
შეხვედრას საქართველოს სავაჭრო-სამრეწველო პალატის პრეზიდენტი - ნინო ჩიქოვანი, საქართველოს ენერგეტიკის მინისტრის მოადგილე - ილია ელოშვილი და ნავთობპროდუქტების იმპორტიორთა კავშირის თავმჯდომარე - ვანო მთვრალაშვილი გახსნიან. საპრეზენტაციო ნაწილის შემდეგ ღონისძიება კითხვა-პასუხის რეჟიმში წარიმართება.
საქართველოს საერთაშორისო საარბიტრაჟო ცენტრი სავაჭრო-სამრეწველო პალატამ 2013 წელს დააფუძნა. იდეა საერთაშორისო პრაქტიკიდან გამომდინარე გაჩნდა. ორგანიზაციის შექმნამდე ამ საკითხზე აქტიურად იმუშავეს პალატისა და მისი პარტნიორი ორგანიზაციების წარმომადგენლებმა. ასევე, საარბიტრაჟო ცენტრის შექმნის პროცესში მნიშვნელოვანი როლი სამუშაო ჯგუფმა ითამაშა, რომელიც როგორც სახელმწიფო უწყებების, ასევე მესამე სექტორის წარმომადგენლებისგან შედგებოდა. საქმიანობის განხორციელების პროცესში საქართველოს საერთაშორისო საარბიტრაჟო ცენტრი სავაჭრო-სამრეწველო პალატისგან აბსოლუტურად დამოუკიდებელია. ცენტრის წესების შემუშავება წამყვანი საერთაშორისო ექსპერტებისგან შემდგარი კომისიის მიერ მოხდა.
