უცხოელებზე მიწის არგაყიდვა ეკონომიკაზე მიზერულ გავლენას იქონიებს, - ამის შესახებ პარლამენტის თავმჯდომარე ირაკლი კობახიძემ "რუსთავი 2"-ის გადაცემა "არჩევანში", მიწასთან დაკავშირებულ რეგულაციებზე საუბრისას განაცხადა.
მისი თქმით, სიღრმისეული გაანალიზება მოხდა იმის, თუ რა წვლილი შეაქვს ეკონომიკურ ზრდაში მიწის გასხვისებას უცხოელებზე ან უცხოურ კომპანიებზე.
„ჩვენ დამატებით სიღრმისეულად გავაანალიზეთ, თუ რა წვლილი შეაქვს მიწის გასხვისებას უცხოელებზე ან უცხოურ კომპანიებზე ეკონომიკურ ზრდაში და პირდაპირ უცხოური ინვესტიციების მოზიდვაში“, - განაცხადა ირაკლი კობახიძემ.
მისივე თქმით, დღეს მიწის ფასი დაბალია, რაც საზოგადოებაში იწვევს იმის ცდუნებას, რომ უცხოელებზე გაყიდონ.
"ჩვენ რაც გვაქვს ინფორმაცია, ხუთნახევარი პროცენტი არის უკვე გასხვისებული უცხოელებზე მიწის რესურსი, რაც არის ძალიან დიდი მაჩვენებელი იმის გათვალისწინებით, რომ, რა თქმა უნდა, საუკეთესო მიწას ყიდულობენ უცხოელები", - დასძინა ირაკლი კობახიძემ.
