ქართველები საქართველოს მიმართ ყველაზე მეგობრულად განწყობილ ქვეყნად უკრაინას მიიჩნევენ, - ამის შესახებ ინფორმაციას IPM-ი ავრცელებს.
"აი-პი-ემის" ინფორმაციით, საქართველოში, სომხეთში, აზერბაიჯანში, რუსეთსა და უკრაინაში განხორციელებული კვლევის თანახმად, მოსახლეობამ შეაფასა თუ რომელი ქვეყნებია მეგობრულად განწყობილი მათი ქვეყნების მიმართ.
კვლევის თანახმად, საქართველოში ქვეყნის ყველაზე დიდ მეგობრად უკრაინას მიიჩნევენ (53%), შემდგომ აზერბაიჯანს (38%), შემდეგია აშშ (33%), მას მოსდევს გერმანია (27%), საფრანგეთი (23%) და თურქეთი (22%). კვლევაში ერთ-ერთი ბოლო ადგილი უჭირავს რუსეთს (6%).
საქართველოსთვის, სომხეთისთვის, რუსეთისა და უკრაინისთვის მეგობარ ქვეყნებად უმეტესად დსთ-ს ქვეყნები მიიჩნევა. ამ ქვეყნებს ყველაზე დიდ ნდობას რუსეთში (77%) და სომხეთში (72%) უცხადებენ. რუსეთის შემთხვევაში ამ შედეგს განაპირობებს ბელარუსის და ყაზახეთის მაღალი წილი, სომხეთისთვის კი რუსეთის მაღალი წილი - 70%-მდე ნდობა მისი მეგობრობის მიმართ.
უკრაინისა და აზერბაიჯანის მიერ საქართველოს მიმართ მეგობრული დამოკიდებულობის აღქმის საფუძველზე, ქართველი მოსახლეობისთვისაც დსთ-ს ქვეყნები შეფასდა, როგორც ჩვენი ქვეყნის მიმართ ყველაზე მეგობრულად განწყობილი ქვეყნები (69%). საქართველოსა და რუსეთისთვის, დსთ-ს ქვეყნების შემდგომ, მეგობრულად განწყობილი "სხვა ქვეყნების" კატეგორიაში შემავალი ქვეყნები აღმოჩნდნენ. რუსეთის მოსახლეობის შეფასებით, ჩინეთის მიერ მათ მიმართ მეგობრული ურთიერთობების მაღალი მოლოდინის გამო, საქართველოს შემთხვევაში კი - აშშ-ს მხრიდან საქართველოს მიმართ მეგობრული ურთიერთობის აღქმის გამო.
თითოეულ ქვეყანაში, კვლევაში მონაწილეობა 1200-მა რესპონდენტმა მიიღო.
