თურქული ავიაკომპანიები “Atlasglobal” და “Pegasus Airlines”, მიმდინარე წლის ზაფხულის სანავიგაციო სეზონის განმავლობაში სტამბული-თბილისი-სტამბულის მიმართულებით რეგულარულ საჰაერო მიმოსვლას გაზრდილი სიხშირით შეასრულებენ.

2017 წლის 19 ივნისიდან, ავიაკომპანია „Atlasglobal“ სტამბული თბილისის საჰაერო ხაზზე კვირაში 3 სიხშირეს ამატებს. ყოველდღიური რეისების გარდა დამატებით ფრენები განხორციელდება ყოველ სამშაბათს, ხუთშაბათსა და კვირას (სულ კვირაში 10 სიხშირე). რაც შეეხება ავიაკომპანია “Pegasus”-ს, 2017 წლის 20 ივნისიდან ავიაკომპანია სტამბული-თბილისის მიმართულებით ამატებს 2 სიხშირეს (სამშაბათი და კვირა) და ფრენები შესრულდება კვირაში 9 სიხშირით.

საქართველოს ეკონომიკისა და მდგრადი განვითარების სამინისტროს სამოქალაქო ავიაციის სააგენტოს მიერ “ატლასგლობალს“ გაზრდილი სიხშირით ფრენების განხორციელების ნებართვა 12 ივნისს მიენიჭა, ხოლო ავიაკომპანია “პეგასუსს“ 14 ივნისს.