MDF- ის კვლევის მიხედვით, საქართველო რეგიონში კრემლის საინფორმაციო გავლენის კუთხით მეორე ადგილზეა.
კრემლის საინფორმაციო გავლენის მხრივ ყველაზე მოწყვლადი უნგრეთია 61 ქულით, მას მოსდევს 54 ქულით საქართველო და 49 ქულით უკრაინა - ეს მონაცემები მოცემულია კვლევაში, რომელსაც წარადგენს მედიის განვითარების ფონდი (MDF).
კვლევაში შესწავლილია კრემლის გავლენის ინდექსი. ეს არის მექანიზმი, რომელიც აღმოსავლეთ და ცენტრალური ევროპის ანალიტიკურმა ჯგუფებმა ცალკეულ ქვეყნებზე რუსეთის საინფორმაციო გავლენის გასაზომად შეიმუშავეს. კვლევა წელს პირველად ოთხ ქვეყანაში ჩატარდა, რომელშიც საქართველოდან ჩართული იყო მედიის განვითარების ფონდი.
ანგარიშში ასახულია კონკრეტულ ქვეყნებში კრემლის მიზნების მისაღწევად გამოყენებული საინფორმაციო რესურსები, მათი გავლენა და კრემლის მიერ მართული ნარატივების შეღწევადობა საზოგადოებაში.
