საქართველოს საგარეო საქმეთა სამინისტროსთან კონგოში დატყვევებული მფრინავის სოსო ოსორაულის მხარდამჭერი აქცია მიმდინარეობს.
არასამთავრობო ორგანიზაცია "პატრიოტთა ლეგიონი", ოსორაულის ოჯახის წევრები და მეგობრები, საქართველოს ხელისუფლებისგან ითხოვენ აქტიური ნაბიჯების გადადგმას და საგარეო საქმეთა მინისტრს მოუწოდებენ აქტიურად ჩაერთოს ოსორაულის გათავისუფლების საქმეში.
როგორც ცნობილია, მეამბოხეებმა კონგოს დემოკრატიული რესპუბლიკის სამხედრო-საჰაერო ძალების ორი შვეულმფრენი 27 იანვარს ჩამოაგდეს. ერთ-ერთ შვეულმფრენს საქართველოს მოქალაქე სოსო ოსორაული მართავდა, რომელიც ტყვედ აიყვანეს. ოსორაულის ტყვედ ჩავარდნის შესახებ ინფორმაცია 22 თებერვალს სამხედრო ბლოგერმა და უფლებადამცველმა Facebook-ზე გაავრცელა. დავით ნემსაძემ მთავრობას ქართველი მფრინავის ტყვეობიდან დახსნისკენ მოუწოდა. სოსო ოსორაული წლების განმავლობაში ქართულ ჯარში მსახურობდა. თავდაცვის სამინისტროს ინფორმაციით, ის შეიარაღებული ძალებიდან 2015 წელს, საკუთარი განცხადების საფუძველზე წავიდა.
24 მაისს საგარეო საქმეთა მინისტრის მოადგილის განცხადებით, კონგოში მომხდარი შეტაკებების დროს ოსორაული, სავარაუდოდ,დაიღუპა, თუმცა მოგვიანებით, ბრიგადის გენერალმა, ამირან სალუქვაძემ განაცხადა, რომ ქართველი მფრინავის შესახებ სხვა იქ მყოფი სამხედროებისგან მიიღო ინფორმაცია და ირწმუნება, რომ ის ცოცხალია.
აქციის მონაწილეები მსვლელობით საქართველოს პარლამენტის შენობასთან გადასვლას გეგმავენ.
