ბათუმი ტურისტების მოლოდინშია. „ზაფხული იწყება აქ“ - ამ სლოგანით ზაფხულის ტურისტული სეზონი აჭარაში ოფიციალურად დღეს გაიხსნა, სადაც უცხოელ თუ ადგილობრივ ტურისტთა სიმრავლე უკვე შეინიშნება.
აჭარის ტურიზმისა და კურორტების დეპარტამენტის თავმჯდომარე სულხან ღლონტი ამბობს, რომ აჭარაში ჩასულ ტურისტს 2017 წელს ძალიან ბევრი სიახლე დახვდება.
სულხან ღლონტი მიმდინარე სეზონზე რამდენიმე სიურპრიზსაც აანონსებს და ამბობს, რომ ამის შესახებ ტურისტებს ინფორმაცია ღონისძიებამდე რამდენიმე დღით ადრე მიეწოდებათ.
თუმცა იმისათვის, რომ ზაფხულის სეზონი სხვადასხვა გასართობი ღონისძიებებით გაჯერებული იყოს, ამისათვის დეპარტამენტი კერძო სექტორთან აქტიურად თანამშრომლობს.
„წლის განმავლობაში ბათუმში ჩამოსულ ტურისტს უამრავი გასართობი ღონისძიებები ელოდება. ესაა ტრადიციული ფესტივალები თუ მრავალი სხვა მიმდინარე ღონისძიება. წლის განმავლობაში ვგეგმავთ რამდენიმე სიურპრიზსაც და ამ ღონისძიებების შესახებ ტურისტებს რამდენიმე დღით ადრე შევატყობინებთ.
ჩვენ აქტიურად ვთანამშრომლობთ კერძო სექტორთან, რომელთაც მნიშვნელოვანი ღონისძიებები აქვთ დაგეგმილი და ასე, რომ ზაფხული ბათუმში და ზოგადად აჭარაში იქნება ძალიან ხალისიანი“, განმარტავს სულხან ღლონტი.
აჭარის ტურიზმის დეპარტამენტის თავმჯდომარე დარწმუნებულია, რომ ზღვის გარდა ტურისტებს აჭარაში დაცული ტერიტორიებიც დააინტერესებს, რისი პოპულარიზაციისთვის დეპარტამენტი აქტიურად მუშაობს და მარკეტინგული კამპანიის წარმოებისთვის თანხებს საკუთარი ბიუჯეტიდან ხარჯავს.
„მნიშვნელოვანია, რომ აქტიური მარკეტინგული კამპანია დავიწყეთ ჩვენი დაცული ტერიტორიების პრომოუშენისთვის. პირველ რიგში ჩვენი ქვეყნის სიმდიდირეები უნდა ვიცოდეთ. აჭარა არის რეგიონი, სადაც არამარტო ზღვაა არამედ ეროვნული პარკები და დაცული ტერიტორიები. ეს ყველაფერი კი ერთმანეთთან ძალიან ახლოსაა. მნიშვნრელოვანია ამის შესახებ მეტი ვიცოდეთ და რაც მთავარია ადგილზე ვიგრძნოთ თუ რა მდიდარი ბუნების შვილები ვართ“, აცხადებს სულხან ღლონტი.
ზაფხულის ტურისტულ სეზონზე, რომელიც ოფიციალურად 9 ივნისს გაიხსნა, აჭარა 2016 წლის მაჩვენებლების გაუმჯობესებას ელოდება და წლის ბოლომდე რეკორდული რაოდენობის ტურისტების მოლოდინშია.
„ყველას ვულოცავ ზაფხულის ტურისტული სეზონის გახსნას. „ზაფხული იწყება აქ“ - სწორედ ესაა 2017 წლის ტურისტული სეზონის სლოგანი. ბათუმი და ზოგადად აჭარა მიმდინარე წელს ტურისტების რეკორდულ მაჩვენებელს ელოდება, რაზეც უკვე არსებული სტატისტიკური მაჩვენებლებიც მეტყველებს. იმისათვის, რომ ტურისტრები მოგვეზიდა აჭარის ტურიზმისა და კურორტების დეპარტამენტმა აქტიურად იმუშავა. წელს მარკეტინგულ კამპანიას ვაწარმოებთ 16 სამინზე ბაზარზე, რაც ჩვენთვის უკვე რეკორდულია. წელს ჩვენ დავიწყეთ მარკეტინგული კამპანია ისეთ სამიზნე ქვეყნებში, სადაც აქამდე ჩვენი მხრიდან ასეთი კამპანიები არ ყოფილა, ეს არის ლატვია, ესტონეთი, გერმანია, პოლონეთი და ასე შემდეგ. მნიშვნელოვანია, რომ ჩვენი ქვეყანა და ჩვენი რეგიონი და განსაკუთრებით ქალაქი ბათუმი იყოს უფრო მეტად ცნობადი“, აცხადებს აჭარის ტურიზმი დეპარტამენტის ხელმძღვანელი.
