დედაქალაქის მუნიციპლაიტეტის საკრებულოში თბილისის 2017 წლის ბიუჯეტში შესატანი ცვლილებების შესახებ იმსჯელეს, რომლის მიხედვითაც ტენდერებიდან მოძიებული რესურსების დიდი ნაწილი თბილისის საჯარო ბაგა-ბაღებში ინფრასტრუქტურის გაუმჯობესებას მოხმარდება.
როგორც საკრებულოს განათლებისა და კულტურის კომისიის თავმჯდომარემ, პარტიის „ქართული ოცნება - დემოკრატიული საქართველო“ წევრმა თამარ ტალიაშვილმა აღნიშნა, 1 500 000 ლარით იზრდება სკოლამდელი აღზრდის დაწესებულებების ხელშეწყობის ქვეპროგრამა, აღნიშნული თანხები კი თბილისის 19 საბავშვო ბაგა-ბაღის ეზოებში ასფალტის საფარისა და სანიაღვრე სისტემების მოწყობას მოხმარდება.
აღნიშნულ საკითხთან დაკავშირებით ოპოზიციის მხრიდან დაისვა შეკითხვები, რის პასუხადაც განათლებისა და კულტურის კომისიის თავმჯდომარემ დეტალურად გააცნო დამსწრე საზოგადოებას ბიუჯეტით განსაზღვრული ცვლილებები. ასევე წარმოადგინა პრეზენტაცია, რითაც დაასაბუთა ამ კონკრეტულ ბაგა-ბაღებში ინფრასტრუქტურული პრობლემების არსებობა და მათი გაუჯობესების აუცილებლობა.
თამარ ტალიაშვილის ინიციატივით, საკრებულოს განათლებისა და კულტურის კომისია მაჟორიტარ დეპუტატებთან და თბილისის მერიის ბაგა-ბაღების მართვის სააგენტოსთან ერთად თვეებია მუშაობს, რათა თბილისის მუნიციპალიტეტის 2017 წლის ბიუჯეტის ცვლილებებით გათვალისწინებულ იქნას სკოლამდელი აღზრდის დაწესებულებების ხელშეწყობა და ბაგა-ბაღები ახალ სასწავლო წელს გაუმჯობესებული ინფრასტრუქტურით შეხვდნენ.
ასფალტის საფარსა და სანიაღვრე სისტემებს რეაბილიტაცია N50 , N89 , N107, N135 , N151 , N185, N 190 , N13, N173 , N184 , N186 , N 39, N40 , N192 , N167 , N 76 , N111 ,N 116 , N196 ბაგა-ბაღებში ჩაუტარდება.
თამარ ტალიაშვილის განცხადებით, მერიის მიერ საჭიროებების შესწავლა მუდმივად მიმდინარეობს და მსგავსი სარეაბილიტაციო სამუშაოების ჩატარება მომავალშიც იგეგმება ახალი ბაღების მშენებლობისა და კაპიტალური სარემონტო სამუშაოების ჩატარების პარალელურად.
