ვახტანგ ბოჭორიშვილის სახელობის კლინიკასთან, რომელიც დღეს პრემიერმა უნდა გახსნას, ინფექციური პათოლოგიის, შიდსისა და კლინიკური იმუნოლოგიის ცენტრის თანამშრომლები საპროტესტო აქციას მართავენ და მათთვის შენობის უმოკლეს ვადაში აშენებას და სამუშაო პირობების გაუმჯობესებას ითხოვენ, - ამის შესახებ საზოგადოებრივი მაუწყებელი წერს.
ცენტრის აღმასრულებელი დირექტორის, შოთა გოგიჩაიშვილის განმარტებით, სახელმწიფომ დაპირება უნდა შეასრულოს და შენობა ააშენოს, სადაც პაციენტის ღირსეულად მიღების და კვალიფიციურად მომსახურების საშუალება იქნება.
„ჩვენ დიდი ხანია ამ საკითხებზე ჯანდაცვის სამინისტროსთან კონსულტაცია გვაქვს, თუმცა ამ პროცესის ადგილიდან დაძვრა ვერ ხერხდება. ბოლო 8 თვე მხოლოდ იმას დასჭირდა, რომ კომპანია შეერჩიათ, რომელიც პროექტს 6 თვის მანძილზე გააკეთებდა. ამის შემდეგ მშენებლობის ეტაპი უნდა დაიწყოს, რასაც მინიმუმ 3-4 წელი დასჭირდება. მართალია, ტერიტორია გამოყოფილია, საპროექტო სამუშაოების შემსრულებელი კომპანიის მოძიება და გამარჯვებულის გამოვლენა გრძელდება, მაგრამ ფაქტის წინაშე ვდგავართ, რომ ის შენობები, რომელშიც ცენტრია განთავსებული, ნგრევის პირასაა და ახალი ჯერ არც დაწყებულა“,- განაცხადა შოთა გოგიჩაიშვილმა.
აკადემიკოს ვახტანგ ბოჭორიშვილის სახელობის კლინიკა დღეს პრემიერმინისტრმა გიორგი კვირიკაშვილმა ოფიციალურად უნდა გახსნას. აქციაზე მისული თანამშრომლები მათი პრობლემების შესახებ პრემიერის საქმის კურსში ჩაყენებას გეგმავენ.
„თუ რაიმე რადიკალური ზომები არ იქნა მიღებული ახალი შენობის დასაწყებად და მის უმოკლეს ვადაში დასამთავრებლად, სახელმწიფო დაკარგავს ისეთი მნიშვნელობის დაწესებულებას, რომელიც 2010 წელს ჯანდაცვის მსოფლიო ორგანიზაციის მიერ მსოფლიოში საუკეთესო ინფექციური დაავადებების მართვის ცენტრად იყო აღიარებული. ცენტრის ტერიტორიისა და შენობების პრივატიზება 2009-2011 წლებში ჯერ კიდევ ძველმა ხელისუფლებამ კორუფციული გარიგების გზით მოახდინა. დღეს ეს ყველაფერი "ავერსის" კუთვნილებაა და სახელმწიფო არენდის ფულს იხდის. დღემდე მილიონ ნახევრამდე უკვე არენდის ფულადაა გადახდილი", -განაცხადა შოთა გოგიჩაიშვილმა.
