Flydubai-მ და Emirates Airlines-მა კატარის მიმართულებით ფრენები შეაჩერეს. უცხოური მედიის ინფორმაციით, დუბაის ავიაკომპანია flydubai 6 ივნისიდან დუბაიდან დოჰადან მიმართულებით ყველა ავიარეისს აუქმებს.
ავიაკომპანია იმ მგზავრებს, რომელთაც ბილეთები უკვე შეძენილი აქვთ, მოუწოდებს შესაბამის ტურისტულ სააგენტოებსა და ავია-ვებსაიტებს მიაკითხონ, სადაც თავის დროზე ბილეთები შეიძინეს.
ანალოგიური ინფორმაცია ვრცელდება Emirates Airlines-ზეც. ავიაკომპანია 6 ივნისიდან დოჰადან ყველა რეისს აჩერებს. ბოლო რეისს, აბუ-დაბი-დოჰა ავიაკომპანია 6 ივნისს 02:45 საათზე, ხოლო დოჰადან-აბი-დაბის მიმართულებით 4:00 საათზე განახორციელებს.
შეგახსენებთ, რომ საუდის არაბეთმა, ეგვიპტემ, ბაჰრეინმა და არაბეთის გაერთიანებულმა საემიროებმა კატართან დიპლომატიური ურთიერთობა შეწყვიტეს და ის რეგიონის დესტაბილიზაციაში დაადანაშაულეს.
ამ ქვეყნების ხელისუფლება ამტკიცებს, რომ კატარი მხარს უჭერს ტერორისტულ დაჯგუფებებს.
საუდის არაბეთის მედიის ცნობით, ერ-რიადმა კატართან სახმელეთო, საზღვაო და საჰაერო კავშირი შეწყვიტა.
ოფიციალური პირების განცხადებით, ეს ტერორიზმისა და ექსტრემიზმის საფრთხისგან ეროვნული უსაფრთხოების დაცვის მიზნით გაკეთდა.
საჰაერო და საზღვაო მიმოსვლა კატართან ეგვიპტემაც ჩაკეტა.
არაბეთის გაერთიანებულმა საემიროებმა კატარელ დიპლომატებს ქვეყნის დასატოვებლად 48 საათი მისცეს. აბუ-დაბიმ კატარი ტერორიზმის მხარდაჭერასა და მის დაფინანსებაში დაადანაშაულა.
ბაჰრეინის ხელისუფლების განცხადებით კატართან ურთიერთობა მის საშინაო საქმეებში ჩარევისა და ქვეყანაში კატარის მხრიდან სტაბილურობისთვის საფრთხის შექმნის გამო შეწყვიტა.
არაბული ქვეყნების კოალიციამ, რომელიც იემენში ამბოხებულების წინააღმდეგ იბრძვის, კატარი ალიანსიდან გარიცხა და განაცხადა, რომ დოჰა მხარს უჭერს ტერორიზმს, კერძოდ ექსტრემისტულ ორგანიზაციებს „ალ-ქაიდასა“ და „ისლამურ სახელმწიფოს“.
ოთხ არაბულ ქვეყნასთან დიპოლომატიური ურთიერთობის გაწყვეტასთან დაკავშირებით დოჰას ოფიციალური განცხადება ჯერ არ გაუკეთებია.
მანამდე კატარის ხელისუფლებამ უარყო ტერორისტებთან კავშირი და განაცხადა, რომ მის წინააღმდეგ ცილისმწამებლური კამპანია მიმდინარეობს.
