აზერბაიჯანელი ჟურნალისტის აფგან მუხტარლის მეუღლე ლეილა მუსტაფაევა საქართველოს შინაგან საქმეთსა მინისტრს გიორგი მღებრიშვილს ხვდება. შეხვედრა ამ წუთებში შსს-ს შენობაში იმართება.
ლეილა მუსტაფაევა შეხვედრაზე ადვოკატ არჩილ ჩოფიკაშვილთან ერთად მივიდა. ის შეხვედრაზე ძველი თბილისის პოლიციის პირველი განყოფილებიდან წავიდა. გამოკითხვიდან გამოსვლის შემდეგ კი, მან უკმაყოფილება გამოთქვა, რომ მისი მეუღლის საქმის გამოძიებასთან დაკავშირებით ქართველ სამართალდამცველებს მათთვის ჯერ არაფერი უთქვამთ და საქმის მასალები არ გაუცნიათ.
აზერბაიჯანელი ჟურნალისტის აფგან მუხტარლის ოჯახმა 29 მაისს განაცხადა, რომ მუხტარლი გაუჩინარდა. მოგვიანებით, გაირკვა, რომ ის ბაქოში, სახელმწიფო საზღვრის სამსახურის საგამოძიებო განყოფილებაში იმყოფებოდა. აზერბაიჯანის პროკურატურის განცხადებით, აფგან მუხტარლიმ საზღვარი გამშვები პუნქტის გვერდის ავლით, პირადობის მოწმობის გარეშე გადაკვეთა. ადვოკატის ინფორმაციით, მუხტარლის ბრალად წაუყენეს საზღვრის უკანონოდ გადაკვეთა, კონტრაბანდა, სამართალდამცავებისათვის წინააღმდეგობის გაწევა (სისხლის სამართლის კოდექსის 318.1, 206.1 და 315.2 მუხლები). მას სასამართლომ სამთვიანი წინასწარი პატიმრობა შეუფარდა.
