დღეიდან სამაშველო სამსახურმა სანაპირო ზოლზე მუშაობა ოფიციალურად დაიწყო. საზღვაო სეზონის გახსნასთან დაკავშირებით, იახტკლუბის მიმდებარე ტერიტორიაზე, შსს საგანგებო სიტუაციების მართვის სააგენტოს წყალზე სამაშველო სამსახურის განახლებული აღჭურვილობის პრეზენტაცია გამართა. ღონისძიებას აჭარის მთავრობის თავმჯდომარე ზურაბ პატარაძე შინაგან საქმეთა მინისტრის მოადგილეებთან, დავით ვარდიაშვილთა და მერაბ მალანიასთან აჭარის ფინანსთა და ეკონომიკის მინისტრთან ერთად დაესწრო. ხელმძღვანელმა პირებმა სამაშველო სამსახურის თანამშრომლებს სიტყვით მიმართეს და გასულ სეზონზე მიღწეული წარმატებებისთვის მადლობა გადაუხადეს. აჭარის მთავრობის თავმჯდომარემ საუბრისას აღნიშნა,რომ მომსახურების თანამედროვე სტანდარტების დამკვიდრება საზღვაო კურორტების უსაფრთხოებას და რეგიონის პოპულარიზაციას შეუწყობს ხელს.
მაშველებმა წყალზე მცურავი საშუალებები წარმოადგინეს. სარფის მონაკვეთიდან ჩოლოქამდე დამსვენებლების უსაფრთხოებაზე წელს 135 მაშველი იზრუნებს. შსს-მ არსებული ტექნიკის შეკეთება, მაშველებისთვის ახალი ეკიპირების შესყიდვა უზრუნველყო. მაშველები პირველადი სამედიცინო დახმარების აფთიაქებით არიან აღჭურვილები, რაც მათ დაზარალებულებისთვის პირველადი დახმარების აღმოჩენის საშუალებას მისცემს. ღონისძიებას საქართველოს სამთავრობო დაცვის უფროსი ანზორ ჩუბინიძე დასხვა მოწვეული სტუმრები ესწრებოდნენ.
