"ევროპული საქართველო" აზერბაიჯანელი ჟურნალისტის აფგან მუხტარლის საქმეზე სახელმწიფო უსაფრთხოების სამსახურის უფროსისა და შინაგან საქმეთა მინისტრის პარლამენტში მისვლას ითხოვს. ამის შესახებ პარტიის წევრმა ოთარ კახიძემ დღეს გამართულ ბრიფინგზე განაცხადა.
"არსებობს ინფორმაცია, რომ საქმეში მონაწილეობდა კრიმინალური პოლიციის სამი თანამშრომელი. ასევე, დანაშაულში ჩართულნი იყვნენ უსაფრთხოების სამსახურის და შინაგან საქმეთა სამინისტროს მაღალჩინოსნები. ეს არის საქართველოს სახელმწიფო ინტერესების წინააღმდეგ მიმართული ქმედება. საპარლამენტო უმრავლესობას მოვუწოდებთ, გააცნობიერონ ამ ქმედების სიმძიმე და ნუ გახდებიან თავგასული ძალოვნების მძევლები", - განაცხადა კახიძემ. ჟურნალისტი აფგან მუხტარლი თბილისიდან 29 მაისს გაუჩინარდა. ის სახლიდან გავიდა და არ დაბრუნებულა. მოგვიანებით, ცნობილი გახდა, რომ ის ბაქოში გადაიყვანეს. დღეს ბაქოს მას საქალაქო სასამართლომ სამთვიანი წინასწარი პატიმრობა შეუფარდა. ჟურნალისტს აზერბაიჯანის პროკურატურამ ბრალი კონტრაბანდის, სახელმწიფო საზღვრის უკანონო გადაკვეთისა და პოლიციისთვის დაუმორჩილებლობის მუხლებით წარუდგინა.
აფგან მუხტარლის საქმესთან დაკავშირებით, საქართველოს შსს-მ გამოძიება დაიწყო საქართველოს სსკ-ს 143-ე მუხლით, რაც თავისუფლების უკანონო აღკვეთას გულისხმობს. სახელმწიფო უსაფრთხოების სამსახურის ხელმძღვანელის ვახტანგ გომელაურის განცხადებით, აზერბაიჯანელი ჟურნალისტი „მწვანე საზღვარზე“ დააკავეს და არა გამშვებ პუნქტზე.
