დღეს საქართველო პოლიციელის დღეს აღნიშნავს და როგორც ხედავთ, ჩვენს ზეიმს იზიარებენ და თითოეულ პოლიციელს გვერდში უდგანან მსოფლიოს განვითარებული ქვეყნების სამართალდამცველები, - ამის შესახებ შს მინისტრმა, გიორგი მღებრიშვილმა პოლიციის დღესთან დაკავშირებით გამართულ ღონისძიებაზე, სიტყვით გამოსვლისას განაცხადა.
მინისტრმა უცხოელ კოლეგებს ზეიმის გაზიარებისთვის მადლობა გადაუხადა.
„გილოცავთ პოლიციელის დღეს. დღეს საქართველო პოლიციელის დღეს აღნიშნავს და როგორც ხედავთ, ჩვენს ზეიმს იზიარებენ და თითოეულ პოლიციელს გვერდში უდგანან მსოფლიოს განვითარებული ქვეყნების სამართალდამცველები, ჩვენი კოლეგები და მეგობრები დასავლეთიდან, ჩვენი რეგიონიდან. ჩვენც მაქსიმალურად ვცდილობთ, მათ მხარდამხარ ვიდგეთ. მინდა მადლობა გადავუხადო კოლეგებს, რომლებიც საგანგებოდ ჩამოვიდნენ იმისთვის, რომ საქართველოს პოლიციელს პროფესიული დღე მიულოცონ. სხვადასხვა ქვეყნის პოლიციელების ერთიანობას და სოლიდარობას დიდი მნიშვნელობა აქვს, სოლიდარობას განსაკუთრებით დიდი მნიშვნელობა აქვს ევროინტეგრაციის პროცესში. მიმდინარე წლის 28 მარტიდან საქართველოს მოქალაქეები ევროკავშირში უვიზოდ მოგზაურობენ და ქართველი ხალსხს ამ ისტორიულ მონაპოვარში თითოეულ პოლიციელს უდიდესი წვლილი აქვს შეტანილი“, - განაცხადა მღებრიშვილმა.
ცნობისთვის, შს სამინისტროსთან პოლიციელის პროფესიული დღე აღინიშნება. ღონისძიებას საქართველოს პრემიერ-მინისტრი გიორგი კვირიკაშვილი, შს მინისტრი გიორგი მღებრიშვილი, საქართველოს მთავრობისა და პარლამენტის წევრები, თბილისში სპეციალურად ამ დღისთვის ჩამოსული ლატვიისა და ლიტვის შს მინისტრები, სხვადასხვა ქვეყნის საპოლიციო სტრუქტურების ხელმძღვანელი პირები და დელეგაციები, ასევე საქართველოში აკრედიტებული დიპლომატიური კორპუსის წარმომადგენლები ესწრებიან.
