ჰოლანდიის მეფემ ვილემ-ალექსანდერმა აღიარა, რომ ტახტზე ასვლის შემდეგ დიდი ხნის განმავლობაში ინკოგნიტოდ პილოტად მუშაობდა და მგზავრების გადაყვანაზე ზრუნავდა.
ის, რომ ვილემ-ალექსანდერი თვითმფრინავს მართავდა მისი ტახტზე ასვლამდეც იყო ცნობილი. ის საშუალომაგისტრალურ Fokker 70-ს მართავდა, რათა შესაბამისი ლიცენზია შეენარჩუნებინა.
თუმცა აქამდე ცნობილი არ იყო, რომ კორონაციის შემდეგ ვილემ-ალექსანდერი თვეში ორჯერ, ინკოგნიტოდ KLM-ის შვილობილ KLM Cityhopper-ში მეორე პილოტად მუშაობდა.
მისი მგზავრები ძირითადად საქმიანი ადამიანები იყვნენ, რომლებიც მოგზაურობდნენ ბრიტანეთის, გერმანიის, ჰოლანდიის და სხვა ევროპული ქვეყნების მიმართულებით.
გაზეთ De Telegraaf-თან ინტერვიუში მეფემ განაცხადა, რომ ის კვლავ გააგრძელებს თვითმფრინავების მართვას, თუმცა ზაფხულში უფრო დიდი ლაინერის Boeing 737s-ის მართვის კურსსაც გაივლის.
„კარგი იქნება თუ ოდესმე ბევრი მგზავრით, ახალი პუნქტის მიმართულებით დავიწყებ რეისების განხორციელებას. სწორედ ამიტომ 737-ის მართვას ვსწავლობ", განმარტა მეფემ.
აღსანიშნავია, რომ რამდენიმე წლის უკან ვილემ-ალექსანდერმა განაცხადა, ის რომ მეფედ არ დაბადებულიყო, აუცილებლად მართავდა Boeing 747-.
სამგზავრო რეისების განხორციელებისას მას დიდ სიამოვნებას ანიჭებდა მგზავრებთან ურთიერთობა, მით უმეტეს როგორც მეორე პილოტს სახელისა და გვარის დასახელება არ ევალება. იმავდროულად KLM-ის ფორმაში მეფის ამოცნობა საკმაორ რთულია.
მისი განმარტებით, ხანდახან მგზავრები ხვდებოდნენ თუ ვინ იმყოფებოდა ბორტზე პილოტის რანგში.
ჰოლანდიის მეფე ვილემ-ალექსანდერი 50 წლისაა და ის მეფობას 2013 წლიდან შეუდგა.
