საქართველოს, 22 მაისს სტამბოლში დაგეგმილ „შავი ზღვის ეკონომიკური თანამშრომლობის ორგანიზაციის“ (BSEC) სხდომაზე, ქვეყნის პირველი ვიცე-პრემიერი, ფინანსთა მინისტრი დიმიტრი ქუმსიშვილი წარადგენს.
BSEC-ის სხდომაზე მრავალი მნიშვნელოვანი საკითხის განხილვა იგეგმება, მათ შორის წევრ ქვეყნებს შორის ურთიერთობების კიდევ უფრო გაღრმავება, მათ შორის ტრანსსასაზღვრო ტრანსპორტის, საზღვაო და ენერგეტიკული ინფრასტრუქტურის განვითარების საკითხები. სხდომაზე იმსჯელებენ ასევე ენერგოეფექტური და „მწვანე“ ტექნოლოგიების განვითარებაზე.
უცხოური მედიის ინფორმაციით, სტამბოლში დაგეგმილ BSEC-ის სხდომას დაესწრება რუსეთის პრემიერ-მინისტრი დიმიტრი მედვედევი, რომელიც ასევე მონაწილეობას მიიღწებს ორგანიზაციის 25 წლის იუბილეში.
აღსანიშნავია, რომ 1992 წლის 25 ივნისს შავი ზღვის აუზის 11 ქვეყნის: ალბანეთი, სომხეთი, აზერბაიჯანი, ბულგარეთი, საქართველო, საბერძნეთი, მოლდოვა, რუმინეთი, რუსეთის ფედერაცია, თურქეთი და უკრაინა (სერბეთი შეუერთდა 2004 წლიდან) სახელმწიფო და მთავრობათა მეთაურებმა, ევროპაში მიმდინარე მოვლენათა სწრაფი ცვლილებების გათვალისწინებით, ბოსფორის განცხადების მიღებითა და სტამბოლის დეკლარაციის ხელმოწერით საფუძველი ჩაუყარეს შავი ზღვის ეკონომიკურ თანამშრომლობას (BSEC), რასაც საფუძვლად დაედო ჰელსინკის დასკვნით აქტში, ევროპაში უსაფრთხოებისა და თანამშრომლობის ორგანიზაციის (OSCE) მიერ მიღებულ დოკუმენტებში და საერთაშორისო სამართლის სხვა საყოველთაოდ აღიარებული პრინციპები.
BSEC-ის მთავარ მიზნებს წარმოადგენდა რეგიონის ეკონომიკური განვითარება და სტაბილურობა, წევრი ქვეყნების ხალხის კეთილდღეობა და შავი ზღვის სივრცეში დემოკრატიული პროცესების ხელშეწყობა.
BSEC-ის გადაწყვეტილების მიმღები მთავარი რეგულარული ორგანო - საგარეო საქმეთა მინისტრთა საბჭო (CMFA), რომლის სხდომასაც, მომზადების მიზნით, წინ უსწრებს უფროსი თანამდებობის პირთა კომიტეტის (SOM) შეხვედრა.
შავი ზღვის ეკონომიკური თანამშრომლობის ორგანიზაციის მუდმივმოქმედი საერთაშორისო სამდივნო (BSEC PERMIS), რომლის შტაბ-ბინა მდებარეობს სტამბოლში და რომელიც ახორციელებს დიდი მოცულობის საქმიანობას ორგანიზაციის წარმატებული ფუნქციონირების მიზნით.
