აჭარის მთავრობა კიდევ ერთ სსიპ-ს აფუძნებს. ინფორმაციული ტექნოლოგიების სამსახურის შექმნით მთავრობა ავტონომიურ რესპუბლიკაში ელექტრონული ტექნოლოგიების გამოყენებით ინოვაციური პროექტების ზრდას ელოდება.
უწყება სამი ძირითადი მიმართულების სპეციალისტებს გააერთიანებს: ქსელური სისტემისა და უსაფრთხოების ადმინისტრატორები, პროგრამირების სპეციალისტები, ვებ-დიზაინერები.
როგორც აჭარის ფინანსთა და ეკონომიკის სამინისტროში განმარტავენ, დღეისათვის უმეტესობა დაწესებულებებს არ გააჩნიათ შესაბამისი სპეციალობის თანამშრომლები.
უწყებაში აცხადებენ, რომ ერთჯერადი ხელშეკრულებების გაფორმების შემდგომ შექმნილი პროგრამული პაკეტები მოუქნელი ხდება, ხოლო მათი ახალი მოთხოვნების შესაბამისობაში მოყვანა შეუძლებელია ან ახალ ხელშეკრულებებს მოითხოვს, რაც დროში იწელება და ზუსტ მოთხოვნას იშვიათად პასუხობს.
„ასევე შეილება ითქვას ვებ-გვერდების შესახებ, მათი დიზაინერული ცვლილება ახალი ტენდერის გამოცხადებას ითხოვს. სამსახურის შექმნის შემთხვევაში მოხდება კოორდინირებული მუშაობა შესაბამის სპეციალისტებთან, რაც გაზრდის თითოეული დაწესებულების შეუფერხებელ მუშაობას.
ინფორმაციული ტექნოლოგიების სამსახურს შესაძლებლობა ექნება თვალ-ყური ადევნოს მსოფლიოს თანამედროვე ტექნოლოგიის, ტექნიკის განვითარებას და მაქსიმალურად დანერგოს ავტონომიურ რესპუბლიკაში, ზუსტად აღწეროს და დაგეგმოს თითოეული დაწესებულების შესაცვლელი-შესაძენი ტექნიკის ოდენობა და სტანდარტი”, აცხადებენ სამინისტროში.
ცხადია ახალი სამსახურის შექმნა რესპუბლიკური ბიუჯეტიდან მისი ფუნქციონირებისათვის აუცილებელი ხარჯების გამოყოფას მოითხოვს. თუმცა, ვინაიდან დაწესებულება მოემსახურება აჭარის აღმასრულებელი ხელისუფლების დაწესებულებების მთლიან სპექტრს, შემცირდება თითოეულ დაწესებულებაში არსებული ე.წ. IT მენეჯერების შრომის ანაზღაურების ხარჯები, ასევე დაწესებულებების საქმიანობისათვის საჭირო პროგრამული მომსახურების ხარჯები და სხვა.
