18 მაისს, 11:00 საათზე, თბილისი ტექნოპარკი ევროპის მეწარმეთა ქსელის (Enterprise Europe Network) საინფორმაციო დღეს უმასპინძლებს.
ღონისძიების ორგანიზატორები არიან საქართველოს ეკონომიკისა და მდგრადი განვითარების სამინისტროს სსიპ საქართველოს ინოვაციების და ტექნოლოგიების სააგენტო (GITA), სსიპ „აწარმოე საქართველოში“ (Enterprise Georgia) და ევროპის მეწარმეთა ქსელი.
ღონისძიება ევროკავშირის თანადაფინანსებით, EU4Business ინიციატივის ფარგლებში მიმდინარე პროექტის „მცირე და საშუალო მეწარმეობის განვითარება და DCFTA საქართველოში“ მხარდაჭერით იმართება, რომელსაც გერმანიის საერთაშორისო თანამშრომლობის საზოგადოება (GIZ) ახორციელებს.
ღონისძიებაში მონაწილეობას მიიღებენ მცირე და საშუალო ზომის საწარმოების წარმომადგენლები და დამწყები კომპანიები (სტარტაპები), რომლებსაც მიეწოდებათ ინფორმაცია ევროპის მეწარმეთა ქსელის შესაძლებლობების შესახებ, კერძოდ, ევროპის ქვეყნებში არსებული პოლიტიკისა და ბიზნეს შესაძლებლობების შესახებ ინფორმირების და კონსულტაციის, ტექნოლოგიების გადაცემის პროცესში დახმარების, ფინანსებზე, კვლევის, განვითარებისა და ინოვიაციების (R&D&I) ევროპულ პროგრამებზე წვდომის უზრუნველყოფის კუთხით.
საქართველოს ინოვაციების და ტექნოლოგიების სააგენტო და სსიპ „აწარმოე საქართველოში“ ევროპის მეწარმეთა ქსელის საკონტაქტო უწყებებს წარმოადგენენ.
დამსწრე საზოგადოებას მისასალმებელი სიტყვით მიმართავს საქართველოს ეკონომიკისა და მდგრადი განვითარების მინისტრის მოადგილე გიორგი ჩერქეზიშვილი, ხოლო ევროპის მეწარმეთა ქსელის შესახებ, მისი წევრობის უპირატესობებსა და პრაქტიკულ მაგალითებზე პრეზენტაციას გამართავს საერთაშორისო კონსულტანტი საგარეო ვაჭრობის საკითხებში ანეტ მორიცი.
