ბათუმი ცენტრალში ტურიზმის ახალი საინფორმაციო ცენტრი დღეს აჭარის მთავრობის თავმჯდომარემ ზურაბ პატარაძემ აჭარის ტურიზმის დეპარტამენტის თავმჯდომარესთან, სულხან ღლონტთან ერთად გახსნა.
დღეიდან, ბათუმში მატარებლით ჩამოსულ ტურისტებს საინფორმაციო ცენტრი მოემსახურება. ცენტრის თანამშრომლები რეგიონის სტუმრებს არსებული ტურისტული ადგილებისა და ღირსშესანიშნაობების შესახებ ამომწურავ ინფორმაციას მიაწვდიან და კონკრეტული ტურების დაგეგმვაში დაეხმარებიან.
ბათუმი ცენტრალში რიგით მე-9 საინფორმაციო ცენტრი გაიხსნა. აჭარის ტურიზმის საინფორმაციო ცენტრებში ვიზიტორთა ზრდა ყოველწლიურად ფიქსირდება. 2017 წლის იანვარ-აპრილის მონაცემებით, აღნიშნული ცენტრები 8 752 ვიზიტორს მოემსახურა, რაც 13,1%-ით აღემატება გასული წლის ანალოგიურ პერიოდს.
2016 წელს საინფორმაციო-ტურისტული ცენტრების მომსახურებით 86 684-მა ვიზიტორმა ისარგებლა, რაც 94%-ით აღემატება 2015 წელს.
ბათუმი ცენტრალში ახალი საინფრომაციო ცენტრის გახსნა ხელს შეუწყობს რეგიონით დაინტერესებული ვიზიტორების რაოდენობისა და ტურისტთა მომსახურების ხარისხის გაზრდას.
