რიყის პარკში, ევროკავშირის წარმომადგენლობა საქართველოში ევროკავშირის წევრი ქვეყნების საელჩოებთან და სხვა პარტნიორებთან ერთად, ,,ევროპის დღეს“ გრანდიოზულად აღნიშნავს. ორგანიზატორების ინფორმაციით, მოვლენის განსაკუთრებულად აღნიშვნა საქართველოში უვიზო მიმოსვლის რეჟიმის ამოქმედებას ეფუძნება.
ღონისძიებები 12:00 საათიდან დაიწყება, 15:00 საათზე კი მას ფორმალურად ევროკავშირის ელჩი საქართველოში იანოშ ჰერმანი, საქართველოს პრეზიდენტი გიორგი მარგველაშვილი და ევროპულ და ევროატლანტიკურ სტრუქტურებში ინტეგრაციის საკითხებში სახელმწიფო მინისტრი ვიქტორ დოლიძე გახსნიან.
საერთაშორისო ფორმატის შესაბამისად, აღნიშნული ღონისძიება საზოგადოებრივი ხასიათისაა და ე.წ. “ევროსოფლის” მოწყობას ითვალისწინებს. ღონისძიების ფარგლებში, მთელი დღის განმავლობაში სხვადასხვა სახის საინფორმაციო და გასართობი ღონისძიებები გაიმართება.
12:00 საათიდან 18:00 საათამდე წარმოდგენილი იქნება დღის გასართობი პროგრამა - საქართველოში ევროკავშირის წევრების პარტნიორი საბავშვო ანსამბლის წარმოდგენები და ევროპიდან მოწვეული პროფესიონალი არტისტები.
19:00 საათზე კი გალა კონცერტი გაიმართება, რომელზეც მოწვეული ევროპული ბენდი - ჯაზანოვა და პოლ რენდოლფი და ქართული ჯგუფი მგზავრები გამოვლენ.
