საქართველოს საგარეო საქმეთა სამინისტრო სასტუმროების ონლაინ დასაჯავშნის ვებგვერდ Booking.com-თან დაკავშირებით განცხადებას ავრცელებს, რომელსაც უცვლელად გთავაზობთ:
"საქართველოს საგარეო საქმეთა სამინისტრო წლებია მუშაობს კომპანია Booking.com - თან. ამ ძალისხმევის შედეგად, ვებგვერდის 40-მდე სხვადასხვა ენოვან ვერსიაში search-ის ფუნქციაში ოკუპირებული აფხაზეთის რეგიონსა და მის ყველა ქალაქს გვერდით საქართველო მიეთითა. ეს ფუნქცია გასასწორებელი დარჩა მხოლოდ რამდენიმე ენაზე. კომპანიასთან მუშაობის შედეგად შევთანხმდით, რომ კიდევ ერთხელ გადაიხედება ვებგვერდის ყველა ტექნიკური ხარვეზი, რაც აფხაზეთის, როგორც ქვეყნის რაიმე ფორმით ხსენებას უკავშირდება, და გასწორდება საერთაშორისო სამართლის შესაბამისად.საგარეო პოლიტიკური უწყება ამავე მიმართულებით კომპანია Airbnb-თანაც მუშაობს. "- ნათქვამია საგარეო საქმეთა სამინისტროს განცხადებაში.
საქართველოს საგარეო პოილტიკური უწყების ცნობით, სამინისტრო მუშაობს ყველა შემთხვევაზე, როცა ამა თუ იმ ვებგვერდზე საქართველოს ოკუპირებული რეგიონები მოცემულია ქვეყნების ჩამონათვალში. "უმეტეს შემთხვევებში ეს არის ტექნიკური ხარვეზია. სწორედ ამიტომ ყველა იმ შემთხვევაში, როცა უწყება უკავშირდებაკომპანიებს, ისინი ასწორებენ ვებგვერდზე არსებულ ხარვეზებს. ცხადია, არ იგულისხმება რუსული ვებგვერდები. "- ამბობენ საგარეო საქმეთა სამინისტროში.
გავრცელებული ინფორმაციით, სასტუმროების ონლაინ დასაჯავშნ ვებგვერდ Booking.com-ზე მომხმარებლის პროფილის რედაქტირებისას და სასტუმროების მფლობელებისთვის ინფორმაციის განთავსებისას, აფხაზეთი მითითებულია, როგორც ცალკე ქვეყანა. საქართველოდან სასტუმროების ძიების დროს, აფხაზეთი მითითებულია, როგორც საქართველოს ნაწილი, ხოლო რუსეთიდან ძიების დროს, აჩვენებს მხოლოდ აფხაზეთს, როგორც ცალკე სახელმწიფოს.
