პერსონალურ მონაცემთა დაცვის ინსპექტორის აპარატი გაეროსა და ევროკავშირის ერთობლივი პროექტის „ადამიანის უფლებები ყველასათვის“ მხარდაჭერით და იუსტიციის სასწავლო ცენტრთან თანამშრომლობით ჟურნალისტიკის ფაკულტეტის პროფესორ-მასწავლებლებისთვის საკვირაო სემინარს ჩაატარებს. სემინარი ყვარლის იუსტიციის სასწავლო ცენტრში 2017 წლის 6-7 მაისს გაიმართება.
სემინარის მონაწილეები იმსჯელებენ საქართველოში პერსონალური მონაცემების დაცვასა და მის მნიშვნელობაზე, არსებულ გამოწვევებზე, ინსპექტორის აპარატის უფლებამოსილებასა და პრაქტიკაზე, ფუნქციებსა და საქმიანობის ძირითად მიმართულებებზე. ასევე, სემინარის ფარგლებში მონაწილეები განიხილავენ პერსონალურ მონაცემთა დაცვის საკითხებს თანამედროვე ეპოქაში, განსაკუთრებული ყურადღება გამახვილდება პერსონალური მონაცემების დაცვასა და გამოხატვის თავისუფლებას შორის ბალანსზე ჟურნალისტური საქმიანობის პროცესში.
საკვირაო სემინარების მთავარი მიზანია ჟურნალისტიკის, მასობრივი კომუნიკაციებისა და მედია-კვლევების მიმართულებით მომუშავე პროფესორ-მასწავლებლების ცნობიერების ამაღლება და სასწავლო პროცესში პერსონალური მონაცემების შესახებ აკადემიური დისკუსიის წახალისება.
