პარლამენტის გარემოს დაცვისა და ბუნებრივი რესურსების კომიტეტს, ასოციაცია „ჭიათურელთა კავშირსა" და ჭიათურის მოსწავლეთა საკრებულოს შორის თანამშრომლობის მემორანდუმი გაფორმდა. დოკუმენტი მწვანე საფარის აღდგენა-განახლებას და სამეცნიერო-საგანმანათლებლო სფეროებში თანამშრომლობას გულისხმობს.
როგორც ხელმოწერის ცერემონიალზე აღინიშნა, სამომავლოდ, თანამშრომლობის ფარგლებში, სემინარები, შეხვედრები, ერთობლივი სასწავლო პროგრამები განხორციელდება. კომიტეტი ჭიათურის მოსწავლეთა საკრებულოს წევრებთან ერთად, გარემოსდაცვით და ეკოლოგიურ პროექტებს განახორციელებს. შეთანხმება გამწვანების აქციებს, ეკოლოგიური გარემოს დაცვა-შენარჩუნებას და მწვანე ნარგავების მოვლასაც ითვალისწინებს.
მემორანდუმის გაფორმებამდე ჭიათურის მუნიციპალიტეტის მოსწავლეთა საკრებულოს წევრებს გარემოს დაცვისა და ბუნებრივი რესურსების კომიტეტის თავმჯდომარე, კახაბერ კუჭავა შეხვდა და რეგიონში გარემოს დაცვის კუთხით არსებულ ვითარებაზე და იმ მიმართულებით არსებულ საკანონმდებლო სიახლეებზე და იმ ინიციატივებზე ესაუბრა, რომელთა მიღებასაც უმაღლესი საკანონმდებლო ორგანო გეგმავს.
შეხვედრაზე ჭიათურის მოსწავლეთა საკრებულოს წევრებმა თავიანთი საქმიანობის, გარემოს დაცვის კუთხით არსებული მდგომარეობისა და ამ მიმართულებით არებული პრობლემების მოგვარების გზებზე პრეზენტაციები წარმოადგინეს.
„ძალიან სასიამოვნო და საინტერესო შეხვედრა იყო. ჩვენ, რა თქმა უნდა, ვიცით ყველა იმ პრობლემური საკითხის შესახებ, რომელიც ჭიათურაში და ზოგადად, რეგიონშია და დაკავშირებულია მანგანუმის წარმოებასთან. თუმცა, ძალიან სასიამოვნო იყო იმის გაცნობიერება და მოსმენა, თუ როგორაა ამაში ჩართული ახალგაზრდობა, როგორ ესმით მათ ეს პრობლემატიკა და რაც ყველაზე მთავარია, აქვთ მათ ამ პრობლემების გადაჭრის თავიანთი ხედვები, რომლებიც დღეს შეხვედრაზე წარმოგვიდგინეს. ჩვენ დავპირდით, რომ კომიტეტის შემდგომი გასვლითი სხდომა ჭიათურაში ჩატარდება. შევეცდებით ადგილზევე გავერკვეთ ყველა დეტალში და იქვე გადავწყვიტოთ, თუ რა ქმედებები უნდა განვახორციელოთ, რომ გარემოს დაცვის კუთხით ჭიათურაში არსებულ პრობლემებს ერთობლივად მივხედოთ." - განაცხადა გარემოს დაცვისა და ბუნებრივი რესურსების კომიტეტის თავმჯდომარემ, კახაბერ კუჭავამ.
დღევანდელ შეხვედრას გარემოს დაცვისა და ბუნებრივი რესურსების კომიტეტის თავმჯდომარის პირველი მოადგილე, ზაზა ხუციშვილი და ჭიათურის მაჟორიტარი, სულხან მახათაძე ესწრებოდნენ.
შეხვედრის დასრულების შემდგომ, მოსწავლეთა საკრებულოს წევრებს ქუთაისის პარლამენტის სასახლეში ექსკურსია ჩაუტარდათ.
